Direktorun rüşvət qalmaqalına Kəramət Böyükçöldən maraqlı reaksiya: “Guya ilk dəfədir…”

Yazıçı Kəramət Böyükçöl rüşvət qalmaqalına görə vəzifəsindən azad edilən 207 nömrəli məktəbin direktorunun sagirdlərdən pul tələb etməsinə maraqlı fikir bildirib.

Tribunainfo.az xəbər verir ki, K.Böyükçölün sözlərinə görə, məktəblərdə elə həmişə fond pulu, süpürgə pulu yığılıb:
“Ağlım kəsəndən Azərbaycanda son zəngə görə pul yığılıb, müəllimlər gününə pul yığılıb, 8 Mart bayramına görə pul yığılıb. Hələ süpürgə pulu, fond pulu, xlor pulunu demirəm. İndi bir məktəb direktorunun səs yazısı yayılıb, son zəngə pul yığılması ilə bağlı. Bir hay-küy qopdu ki, gəl görəsən. Guya birinci dəfədi belə şey görürlər. Axırda direktoru işdən çıxardılar. Azərbaycan belə ölkədi, nə eləyirsən elə, bilinməsin. Hamı yaxşı bilir ki, kabinetlərdə nələr baş verir, amma Hüseybala Mirələmovda bilindi.
Xəyanət eləmək asandı, çətini onu gizli saxlamaqdı. Xəyanət üstü açılanda xəyanət sayılır. Tutulanlar oğru deyil. Oğurluğa cəhd edənlərdi. Əsl oğru tutulmur”.
Xatırladaq ki, sosial şəbəkələrdə Bakı şəhəri 207 nömrəli tam orta məktəbin direktoru Yaqut Müseyibliyə məxsus olduğu iddia edilən səs yazısı yayılıb. İdialara görə, səs yazısında o, “Son zəng” üçün pul yığılmasını tələb edir və pul verməyən şagirdlərin tədbirdə iştirakına icazə verilməyəcəyini qeyd edir. Səs yazısı ilə bağlı araşdırma aparılıb və araşdırma nəticəsində fəaliyyətində yol verdiyi nöqsanlara görə Məktəbəqədər və Ümumi Təhsil üzrə Dövlət Agentliyinin müvafiq əmri ilə təhsil müəssisəsinin direktoru vəzifəsindən azad edilib.