“TikTok”da göndərilən hədiyyələrə görə vergi tutulacaq? — AÇIQLAMA

“Əgər kimsə düşünürsə ki, “TikTok”da qazandığı gəliri gizlətməklə dövlətdən xəbərsiz qalacaq, çox yanılır. Bugünkü sistem elə sadə deyil. Bu platformalar artıq beynəlxalq məlumat mübadiləsi çərçivəsində işləyir və hər bir köçürmə iz buraxır”.

Bunu Demokrat.az-a açıqlamasında hüquqşünas Ramin Qasımov deyib.

O qeyd edib ki, məbləğlər sadəcə, bir müddət görünməyə bilər, amma silinmir.

“Əgər doğrudan da bəzi şəxslər “qara pulları” “TikTok” üzərindən dövriyyəyə buraxırsa, bu, artıq vergi pozuntusu yox, cinayət tərkibli əməl sayılır. Çünki söhbət təkcə vergi ödəməməkdən yox, maliyyə mənbəyinin gizlədilməsindən gedir. 

Ən maraqlısı odur ki, sosial şəbəkələrdə özlərini “uğurlu yayımçı” kimi təqdim edən bir çoxlarının gəlir mənbələri yaxın zamanda audit altına düşəcək. Dövlət artıq bu sahəyə ciddi nəzarət mexanizmi qurur. Ona görə kim 30 min manatlıq hədiyyəni qəbul edirsə, gərək sabah onun mənşəyinə də cavab versin. “TikTok”da qazanılan pul asan gəlir deyil – iz qoyur, sənəd yaradır və ən əsası, qanunun gözü bunu görür.”