Tibbi profilaktikanı bitirənlər həkim hesab olunurmu? - İctimai səhiyyə fakültəsi nədir? - ARAŞDIRMA

Xəbər verdiyimiz kimi, TƏBİB-in İlkin Səhiyyə Xidməti Departamentinin rəhbəri Rəşad Çobanlının ali tibbi təhsilinin olmaması ilə bağlı mediada məlumatlar yayılıb. Yayılan xəbərlərdə onun 2010–2015-ci illərdə peşəkar həkimliklə bağlı olmayan, ictimaiyyət arasında “sanfak” adı ilə tanınan ixtisas üzrə təhsil aldığı bildirilib.

Lakin məsələ ilə bağlı TƏBİB-in açıqlamasında bu iddia təkzib edilib. Qurumdan bildirilib ki, Rəşad Çobanlı 2010–2015-ci illərdə Azərbaycan Tibb Universitetinin Tibbi Profilaktika fakültəsində təhsil alıb və ali “həkim” ixtisas dərəcəsi əldə edib. Bu məsələ ictimaiyyət arasında geniş müzakirələrə səbəb olub.

Maraqlıdır, ATU-nun Tibbi Profilaktika fakültəsini (“sanfak”) bitirənlər həkim hesab olunurlar, yoxsa yox?

Mövzu ilə bağlı ATU "Tibb Jurnalı"nın baş redaktoru, tanınmış mütəxəssis Fuad İslamzadə Bakupost.az - a açıqlamasında bildirib ki, ümumiyyətlə, Tibbi profilaktika fakültəsində çoxlu daxili ixtisaslar mövcuddur:


“Həmin fakültəni bitirənlər müəyyən həkim ixtisaslarına yiyələnə bilərlər. Mənim bildiyimə görə, orada həkim-infeksionist, həkim epidemioloq, həkim-patanatom, həkim-laborant, həkim-mikrobioloq, USM üzrə mütəxəssis, radioloq və digər həkimlər hazırlanır.
Bundan başqa, orada “təbabətin idarə edilməsi”, “tibbi xidmətin rəhbərliyi” ixtisasları da mövcuddur. Bir sözlə, təbabətin idarə edilməsində tibbi menecment sahəsində çalışan mütəxəssislər də hazırlanır. Hazırda həmin sahələr üzrə magistratura təhsili həm Tibb Universitetində, həm də bir neçə başqa universitetdə mövcuddur. Ola bilər ki, tibb üzrə ali təhsili bitirdikdən sonra magistraturanı başqa universitetdə oxuyaraq, tibb menecmenti sahəsində ixtisaslaşmış mütəxəssislər hazırlansın. Mən bunu normal hal hesab edirəm. Mövcud təhsil sistemi üçün bu, normaldır. Təxminən 12–20 il əvvəl, daha dəqiq desək, 2008-ci ilə qədər Tibb Universitetini bitirənlər başqa universitetdə magistratura təhsili ala bilmirdilər. Amma indiki təhsil sistemində buna icazə verilir və bu, qəbahət sayılmır”.

F.İslamzadə bildirib ki, sovet dövründən “Sanfak” kimi tanınan bu fakültə müxtəlif vaxtlarda Sanitariya-gigiyena və Tibbi profilaktika adları ilə fəaliyyət göstərsə də, son illərdə ona "İctimai Səhiyyə fakültəsi" adı verilib:

“Əvvəllər orada cəmi 4–5 ixtisas var idi, indi isə həmin fakültəni bitirənlər magistratura təhsilini davam etdirməklə 30-a yaxın ixtisas sahibi ola bilirlər. Həkim ixtisasları üzrə diplomdan sonrakı təlim rezidentura, digər ixtisaslar üzrə isə magistratura pilləsində həyata keçirilir. Yəni tibbi ixtisaslar üzrə rezidenturaya, səhiyyənin təşkili üzrə isə magistratura pilləsinə qəbul olmaqla təhsillərini davam etdirə bilərlər”.