Əfsun Əhmədov rüşvət aldığı üçün məhkəmə zalında həbs edilən hakimin qardaşı imiş

Azərbaycan Dövlət Kukla Teatrının rejissoru Səidə Haqverdiyeva özünün və teatrın direktoru olan həyat yoldaşı Rəşad Əhmədzadənin təzyiqlərə məruz qaldığı haqda neçə gündür ard-arda bəyanatlar verir. S.Haqverdiyeva baş verənlərin əsas səbəbkarı kimi Azərbaycan Kukla Teatrının aktrisası Nərmin Əhmədovanın adını çəkir.

Rejissor onu və həyat yoldaşını təhdid edən Nərmin Əhmədovanın Mədəniyyət Nazirliyi səviyyəsində himayə olunduğunu bildirir. Bu himayələrin isə Nərmin Əhmədovanın şirkət rəhbəri olan həyat yoldaşı Əfsun Əhmədovla Mədəniyyət Nazirliyi arasında hansısa qaranlıq əlaqələrdən qaynaqlandığı qeyd edilir.
Məlumat üçün xatırladaq ki, Əfsun Əhmədov “Next Group” nəqliyyat şirkətinin rəhbəridir. Həmin şirkət isə Mədəniyyət Nazirliyi və onun tabeliyində fəaliyyət göstərən “Əsaslı Tikinti və Təchizat” MMC ilə ümumi maliyyə dəyəri 608 020 manat təşkil edən satınalma müqavilələri imzalayıb. Bu, dövlət satınalmalarının vahid elektron portalında əksini tapan məbləğdir. Təsdiqlənməyən məlumatlara görə isə “Next Group” MMC Mədəniyyət Nazirliyinin xətti ilə 2 milyon manatlıq sifariş alıb. Bütün bunlar adıçəkilən nazirlikdəki vəzifəli şəxslərin N.Əhmədovanı himayə etməsinin səbəbi kimi qeyd edilir.
AFN.az-ın redaksiyasına “Next Group” MMC-nin rəhbəri Əfsun Əhmədovla bağlı daha bir məlumat daxil olub. Bildirilir ki, o, bu ilin yanvarında rüşvət almağa görə həbs edilən Bərdə Rayon Məhkəməsinin sabiq hakimi Elsun Əhmədovun qardaşıdır. E.Əhmədov Gəncə Ağır Cinayətlər Məhkəməsində keçirilən proses zamanı məhkəmə zalındaca həbs olunub. O, 5 il müddətinə azadlıqdan məhrum edilib.
Qeyd edək ki, onun həbsinə səbəb vətəndaş şikayəti olub. Belə ki, Bərdə Rayon Məhkəməsinin vəzifəli şəxslərinin qanunsuz hərəkətləri ilə bağlı vətəndaş müraciəti əsasında Baş prokuror yanında Korrupsiyaya qarşı Mübarizə Baş İdarəsində Məhkəmə-Hüquq Şurası ilə birgə araşdırma aparılıb.
Araşdırma ilə E.Əhmədovun Bərdə Rayon Məhkəməsinin hakimi vəzifədə işləyərkən narkotik ittihamı ilə saxlanılan Məqsəd Bayramovun həyat yoldaşından bu iş üzrə minimum həddə cəza təyin etmək üçün 21 min manat pulu rüşvət olaraq aldığı məlum olub. Hakim pulu iclas katibi Orxan vasitəsi ilə 10 min, 8 min və 3 min olmaqla hissə-hissə alıb. Aldığı rüşvətin qarşılığında isə Məqsəd Bayramova minimum həddə — 3 il azadlıqdan məhrumetmə cəzası təyin edib.
E.Əhmədov məhkəmədə ifadə verən zaman özünü rüşvət almaqda yox, dələduzluqda günahkar bilib. Pulu almasının səbəbi kimi isə anasının onkoloji xəstə olmasını göstərib. Deyib ki, sonra atası da onkoloji xəstə olduğu üçün aldığı pulu geri qaytara bilməyib.
Qeyd edək ki, E.Əhmədovun fəaliyyətində peşəkar çatışmazlıqlar müəyyən edildiyi üçün Məhkəmə-Hüquq Şurasının 21 dekabr 2023-cü il tarixli qərarı ilə onun səlahiyyət müddəti uzadılmayıb.
İş üzrə toplanmış ilkin sübutlar əsasında Əhmədov Elsun Məzahir oğlu şübhəli şəxs qismində tutulub, ona Cinayət Məcəlləsinin 311.3.3-cü (külli miqdarda rüşvət alma) maddəsi ilə ittiham elan edilib, istintaq orqanının vəsatəti və ibtidai araşdırmaya prosessual rəhbərliyi həyata keçirən prokurorun təqdimatı əsasında barəsində məhkəmənin qərarı ilə ev dustaqlığı növündə qətimkan tədbiri seçilib.
Yazıda adları çəkilən şəxslərin mövqeyini verməyə hazırıq.