"Kapital Bank" hesabından ödənilən pullar yoxa çıxıb, bank isə geri qaytarmır EHTİYATLI OLUN!

Son günlər "Kapital Bank"dan edilən köçürmələr və "BirBank" ödənişləri barədə şikayətlərin sayı artıb.

 
Pravda.az xəbər verir ki, sosial şəbəkələrdə paylaşılan şikayətlərdən birində bankomatdan 200 ABŞ dolları köçürmə edən vətəndaşın pulunun hesaba oturmadığı bildirilib.
 
Vətəndaşın sözlərinə görə, o, noyabrın 4-də "Marriot" hoteldəki aparatdan 200 dollar hesaba göndərib, pulu bankomata daxil etsə də, məbləğ hesaba köçməyib.
 
Vətəndaş dərhal "Kapital Bank"ın "196" qaynar xəttinə müraciət edib. 200 dollar bankın Xırdalan filialına yönəldilib. 12 noyabrda isə bank vətəndaşdan yenidən ərizə istəyib və beş iş günü ərzində məsələyə baxılacağı deyilib.
 
"Bank pulu oğurlayır. Bu pul kameranın altında bankomata daxil edilib və ünvana çatmayıb, bunun nəyini araşdırırsınız?" - şikayətçi bildirib.
 
Maraqlısı budur ki, təxminən, eyni tarixdə bənzər hadisə Pravda.az-ın əməkdaşının da başına gəlib.
 
Belə ki, əməkdaşımız noyabrın 5-i mağazalardan birində "BirBank" hesabından post terminal vasitəsilə 50 manat ödəniş edib. Əvvəlcə əməliyyat uğursuz olub. İkinci dəfə ödəniş etdikdə isə post terminal yenidən serverin cavab verməməsinə dair qəbz təqdim edib. Lakin əməkdaşımızın hesabından 50 manat pul çıxılıb.
 
Problemlə bağlı “196 qaynar xətti”nə, eləcə də "Kapital Bank"ın Mətbuat xidmətinə məlumat verilib. Bankdan sözügedən məbləğlə bağlı "Hələ ki icradadır, qarşı tərəfin hesabına oturmayıb" deyilib.
 
Noyabrın 18-də əməkdaşımız yenidən banka müraciət edib, hesabından məbləğin çıxılmasına, lakin serverin cavab verməməsinə dair qəbz olmasına baxmayaraq “qaynar xətt”dən bildirilib ki, həmin tarixdə belə bir əmliyyat baş tutmayıb.
 
Əməkdaşımız yenidən Mətbuat xidmətinə müraciət edib. Məsələnin bu dəfə də araşdırılacağı deyilib. Uzun çəkən araşdırmanın nəticəsində isə "Kapital Bank"dan gələn cavab belə olub: "Hörmətli müştəri! Təqdim etdiyiniz sənədlər əsasında kartınızdan icra edilmiş əməliyyatın eyniləşdirilməsi mümkün olmadığına görə vəsaitin kart hesabınıza bərpa edilməsi mümkün deyil. Əməliyyatın icra tarixindən sonra 30 təqvim günü ərzində vəsait hesabınıza bərpa edilməzsə, sizə köməklik göstərilməsi üçün müraciət etməyiniz xahiş olunur".
 
Xatırlatma: Son zamanlar "Kapital Bank" vətəndaşların hesablarından pulların oğurlanması ilə bağlı gündəmə gəlir. Bu da məlumdur ki, "Kapital Bank" noyabrın 27-dən etibarən "Birbank" debet və taksit kartları, eləcə də ko-brend kartları üzrə yeni komissiya tətbiq edəcəyini açıqlayıb. Bankın rəsmi məlumatına görə, şəxsi vəsaitlərin bankomatlarda nağdlaşdırılması və ya digər bank kartlarına köçürülməsi zamanı 1 % komissiya tutulacaq. Bu məbləğ minimum 1 manat (və ya 1 dollar, 1 avro) olacaq. Bildirilir ki, bankın yeni qərarından əvvəl, yəni noyabrın əvvəlində icra edilən və problem yaranan əməliyyatların vaxtının uzadılması, problemin vaxtında həll edilməməsi sırf vətəndaşdan komissiya tutulmasına hesablanıb.