Deputat: “Çox maskalar yırtılıb, “5-ci kolon” tam ifşa olunmalıdır”

Əli Kərimlinin DTX tərəfindən dindirilməsi və məhkəmə qərarı ilə barəsində həbs-qətimkan tədbirinin seçilməsi artıq fakt olaraq diqqət çəkir. Gültəkin Hacıbəylinin Türkiyədən ölkəyə gətirilməsi və istintaqa ifadə verməsi də prosesin əhatəli aparıldığını göstərir. Onların Ramiz Mehdiyev ilə hansı mövzular üzrə və hansı formada əlaqədə olmaları isə istintaqın gedişində aydınlaşacaq”.

Bunu Demokrat.az-a açıqlamasında Milli Məclisin deputatı Vüqar İsgəndərov bildirib. 

O deyib ki, bu cür boş xəyallara qapılan, ağılsız, düşüncəsiz və eyni zamanda xəyanətkar insanların Azərbaycan dövlətini sarsıtmağa cəhd etmələridir:

“Bu, açıq-aşkar “5-ci kolon” fəaliyyətidir və tam şəkildə ifşa olunmalıdır. Bu işlərdə, cinayətlərdə əli olan hər bir şəxs qanun qarşısında cavab verməlidir. 

2013-cü il prezident seçkiləri ərəfəsində Moskvada “Milyaderlər İttifaqı” yaradıldı və daha sonra bu qurumun Azərbaycana transformasiya prosesi başladı. İttifaqa Abbas Abbasov rəhbərlik edir, İsa İbrahimbəyovla birlikdə onu idarə etməyə çalışırdı. Paralel şəkildə “Ziyalılar Forumu” və sonradan “İctimai Palata” adı altında fəaliyyət genişləndirildi. Daha sonra bu strukturlar birləşərək “Milli Şura”nı formalaşdırdı. Bütün bu proseslərin planlı şəkildə həyata keçirildiyi görünür. 

Əsas məsələ ondadır ki, formal olaraq Cəmil Həsənli sədr olsa da, əslində bütün taktiki idarəçilik Əli Kərimlinin əlində idi. Maliyyələşmə kanalları, davamlı olaraq mitinqlər keçirmək cəhdləri, bu addımların arxasında Ramiz Mehdiyevə yönəlmiş şübhələr var idi. Gültəkin Hacıbəylinin desant kimi prosesə daxil edilməsi və bütün bunlar müəyyən dairələrin planı idi. Artıq bir çox maskalar yırtılıb. Dövlət Təhlükəsizliyi Xidməti bu məsələləri ciddi şəkildə araşdırır”.

Deputat qeyd edib ki, dövlətə qarşı xəyanətdə əli olan hər bir şəxs mütləq qanun qarşısında cavab verməlidir:

“Bu cılız insanlar unutmamalıdırlar ki, bu gün Azərbaycan dövləti çox güclüdür. Azərbaycan Prezidenti İlham Əliyev bu gün dünyanın sayılıb-seçilən liderlərindəndir. Azərbaycan yalnız Cənubi Qafqazın deyil, daha geniş coğrafiyaların da əsas aktorlarından birinə çevrilib. 

Ölkə sürətlə inkişaf edir və bu inkişaf davam edəcək. 1990-cı illərin zəif dövləti ilə indiki Azərbaycanı müqayisə etmək mümkün deyil. “5-ci kolon”un daxilindəki bu oyunlar, şəxsi maraqlarını dövlət marağından üstün tutan insanların niyyətləri boşa çıxacaq. Hazırda istintaq bu qrupların Ramiz Mehdiyevlə əlaqələri, maliyyə mənbələri və digər məsələləri araşdırır. Araşdırmalar başa çatdıqdan sonra ictimaiyyət hər bir detal barədə məlumatlandırılacaq”.