Qoşqar Təhməzlinin təsis etdiyi şirkətə 865 min manatlıq sifariş

İnnovasiya və Təchizat Mərkəzi "Medeks” şirkəti ilə satınalma müqaviləsi imzalayıb. 

Qaynarinfo-nun məlumatına görə, müqavilədə tibbi sərf mallarının satın alınması nəzərdə tutulur. Müqavilənin maliyyə dəyəri 865 346,51 manatdır. 

İqtisadiyyat Nazirliyi yanından Dövlət Vergi Xidmətinin reyestr məlumatlarına görə, "Medeks” şirkəti 25 fevral 2008-ci ildə qeydiyyata alınıb. Nizamnamə kapitalı 1000 manatdır. Hüquqi ünvanı Bakı şəhəri Nərimanov rayonu, İsmayıl Hidayətzadə küçəsi, məhəllə 1911-də yerləşən şirkətin qanuni təmsilçisi Abbasov Elşən Yusif oğludur. 

"Medeks” MMC-nin rəsmi veb-səhifəsində şirkətin 2006-cı ildə təsis olunduğu qeyd edilib. Maraqlıdır ki, şirkət təsis edildikdən 2 il sonra dövlət qeydiyyatına alınıb. 

Araşdırmalarımız zamanı məlum olub ki, Elşən Abbasovdan əvvəl şirkətin qanuni təmsilçisi Təhməzli Qoşqar İlahi oğlu olub. O, 2016-cı ilədək şirkətə rəhbərlik edib. Mediada gedən məlumatlara görə, şirkətin təsisçisi də Qoşqar Təhməzlidir. 

Qoşqar Təhməzli Azərbaycan Qida Agentliyinin (AQTA) sədridir. O, qurumun rəhbərliyinə 2017-ci ildə təyinat alıb. 

Mediada gedən məlumatların təhlili göstərir ki, "Medeks” MMC hələ də Qoşqar Təhməzlinin nəzarətindədir. 
 

AQTA-da OXŞAR SXEMƏ ÇOX RAST GƏLİNİR

Qeyd edək ki, AQTA və tabeliyindəki qurumlarda oxşar sxemə tez-tez rast gəlinir. 

Məsələn, bu ilin əvvəllərində məlum olmuşdu ki, AQTA-nın tabeliyində fəaliyyət göstərən Azərbaycan Qida Təhlükəsizliyi İnstitutunun (AQTİ) 2024-cü ildə keçirdiyi 24 tenderin böyük hissəsi bir şirkət tərəfindən udulub.

Araşdırmalar zamanı məlum olmuşdu ki, AQTİ 17,7 milyonluq satınalma müqavilələrinin 13,3 milyonluq hissəsini "AVAZ GROUP” MMC ilə bağlayıb. Bu məbləğlər hesabına AQTİ "Avaz Group”dan yalnız laboratoriya avadanlığı və bəzi reaktivlər alıb.

Vergilər Nazirliyinin reyesterində qeyd edilib ki, "Avaz Group” MMC 2007-ci ildə dövlət qeydiyyatına alınıb. Nizamnamə kapitalı 1000 manat olan şirkətin qanuni təmsilçisi isə Mədət Sadıqovdur.

Bu şirkət 25 yanvar 2007-ci il tarixində Sadiq Ərzuman oğlu Məmmədov tərəfindən yaradılıb. Lakin sonradan şirkətin qanuni təmsilçisi dəyişdirilib və onun başına AQTA-nın rəhbəri Qoşqar Təhməzlinin öz şirkəti olan "Medeks”dəki işçisi Mədət Sadıqov gətirlib.

Sadiq Məmmədov məhz Qoşqar Təhməzli tərəfindən 14 sentyabr 2018-ci ildə Qida Təhlükəsizliyi İnstitutunun İdarə Heyətinin sədri təyin edilib. Lakin 2023-cü ildə vəzifəsindən azad edilib. Hazırda onun "Avaz Group”un idarəçiliyini həyata keçirdiyi deyilir.