“Elit tort ləvazimatları” körpələr üçün vaxtı keçmiş şokalad satır — FOTO

30 dekabr 2025-ci il tarixində paytaxtın Nəsimi rayonu, 28 May filialında yerləşən “Elit Tort Ləvazimatları” mağazasından alış-veriş edən müştəri Sevinc Allahverdiyeva vitrində yerləşdirilən şokoladların təzə olub-olmaması ilə bağlı kassirə xüsusi olaraq müraciət edib.

Tribuna.az-a şikayətini bildirən S. Allahverdiyeva məhsulların körpə uşaqlar üçün alındığını vurğulayıb və təzə olduğu halda təqdim edilməsini xahiş edib.
Görmə problemi səbəbilə məhsulun üzərindəki son istifadə tarixini oxuya bilmədiyini, həmin anda eynəyinin üzərində olmadığını bildirən müştərinin sözlərinə görə, kassir bu məlumatı eşitməsinə baxmayaraq məhsulu satışa təqdim edib.
Qeyd olunur ki, kassadan verilən çekdə də göründüyü kimi, müştəri həmin məhsuldan 4 ədəd alıb və uzun müddətdir mağazanın daimi müştərisidir.

Hadisə ictimai narahatlıq doğurduğundan məsələ ilə bağlı Tribuna.az-a açıqlama verən Azad İstehlakçılar Birliyinin (AİB) sədri Eyyub Hüseynov suallarımızı cavablayıb.
Belə vəziyyətlə üzləşən vətəndaş ilk olaraq hansı addımları atmalıdır?
Azərbaycanda bu tip halların qarşısını almaq üçün nəzarət mexanizmləri yetərlidirmi?
E. Hüseynovun sözlərinə görə, istehlakçıların hüquqlarının müdafiəsi haqqında Azərbaycan Respublikasının qanunu, eləcə də beynəlxalq qanunlarda istehlakçının mal haqqında müfəssəl informasiya almaq hüququ tanınır. Qanunlarda göstərilir ki, satıcı istehlakçının tələbi əsasında mal haqqında müfəssəl informasiyaya malik olmalı, bunu istehlakçıya ötürməlidir.
Ekspert ölkədəki vəziyyəti analiz edərək qeyd edib:
“Çox təəssüflər olsun ki, Azərbaycanda bisnes qurumlara elə ərkəsöyün şərait yaradılıb ki, onlar istehlakçı hüquqlarını tanımaq istəmirlər. Və istehlakçıya yeriyən pul kisəsi kimi baxırlar. Bunun da səbəbi ölkədə istehlakçı siyasətinin zəif olmasından qaynaqlanır. İstehlakçıların müdafiəsi haqqında qanun 1995-ci ildə qəbul edilib. Ondan sonra edilən dəyişikliklər istehlakçıların zərərinə olub. Belə bir şəraitdə biznes qurumları vəziyyətdən sui-istifadə edib istehlakçının iradına, təklifinə, tələbinə əməl etmirlər. Bu kimi hallarla bağlı hər gün çox sayda şikayətlər gəlir. Bu qanun pozuntusudur. Əgər xanım dövlət orqanlarına müraciət edərsə, bu kimi işlərə baxan dövlət orqanı olan Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyidir. Vətəndaşlar hüquqlarının pozulduğu zaman (012 599 76 00) əlaqə nömrəsinə müraciət etsin və hüququnun qorunması üçün problemlər barədə onlara məlumat versin.
Ağıllı biznes sahibi istehlakçını özünün şəriki hesab etməlidir. Və bilməlidir ki, biznesi mövcud edən biz istehlakçılarıq. Dövlət qurumları da bilməlidirlər ki, dövləti, ordunu, büdcəni dolduran biz istehlakçılarıq. Ona görə də istehlakçının səsi ən ali dövlət orqanlarında eşidilməlidir.”
Hadisə ilə bağlı qarşı tərəfin mövqeyini öyrənmək üçün Nəsimi filialında yerləşən “Elit tort ləvazimatları” ilə əlaqə saxlayaraq çekləri və vaxtı keçmiş məhsulu təqdim etdik.
Sorğumuza cavab olaraq bildirilib:
“Bizdə hər il 1 qutu şaxta baba şokaladı gəlir və satılıb bitir. Vaxtı keçmiş mal ola bilməz. Bu bizim şaxta baba deyil. Əgər belə hal varsa, müştəri əlaqədar qurumlara şikayət etsin. Bizdə olan şaxta babanın sertifikatı belə var. Əlaqədar quruma müraciət edilsin.”