Ödəniş etdin, yenə cərimə yazıldı – “Azparking”in anlaşılmaz sistemi

Azərbaycanda “Azparking” xidmətindən istifadə edən sürücülər maraqlı və bir o qədər də absurd hesab edilən problemlə üz-üzə qalıblar. Belə ki, vətəndaş parklanma üçün lazımi vəsaiti ödəsə də, müəyyən müddət sonra heç bir qaydanı pozmadığı halda cərimə tətbiq edilir. Bu hal daha çox avtomobilini uzunmüddətli – 24 saatlıq parklanma müddətinin tamam olmasından sonra müşahidə edilir.

Yenilik.az xəbər verir ki, Modern.az sürücüləri narahat edən mövzu ilə bağlı “Azparking” xidmətinin idarəçiliyini həyata keçirən Azərbaycan Yerüstü Nəqliyyat Agentliyi (AYNA) ilə əlaqə saxlayıb. Qurum faktı təsdiqləyərək cərimələrin yanama səbəbi olaraq xidmətin mobil tətbiqinin iş prinsipini əsas göstərib.

“İstənilən halda parklanma statusu 24 saatın sonunda dayandırılır. Axşam saat 22:00-dan səhər saat 7:00-a qədər parklanma xidmətinə ödəniş tələb olunmur. Bazar günləri üçün də ödəniş nəzərdə tutulmayıb. Saat 7:00-dan sonra müştəri parklanmanı tətbiqdə aktiv etmirsə, cərimə avtomatik olaraq yaranır. Lakin sistemin avtomatik aktivləşməsi zamanı ödənişsiz müddət üçün cərimə yazılmır. İstənilən halda parklanmanı sürücü özü aktiv etməlidir. Proqram isə müəyyən olunan qaydalar daxilində və təyin olunan zamanlarda sürücünün öncədən tənzimləmədiyi halda özü xidməti deaktiv edir. Lakin “Azparking” park yerini tutulmuş hesab etdiyi üçün cərimə tətbiqinə başladılır. Parklanma xidmətinin ödənişləri kamera görüntüsünə görə qərarlaşdırılmır. Yalnız mobil tətbiq həlledicidir”.

Bu sistemin iş mexanizmindən aydın olur ki, qanunvericiliyə görə ödənişli parklanma yerlərində müvafiq ödəniş edilmədən parklanmaya görə 20 manat məbləğində cərimə nəzərdə tutulur (İnzibati Xətalar Məcəlləsinin 346-1. maddəsi). Sürücü parklanmanı tətbiq vasitəsilə yenidən aktivləşdirməyi unutduqda, proqram xidməti dayandırsa da, avtomobilin həmin yerdə olması tətbiq tərəfindən “ödənişsiz istifadə” kimi qəbul edilir və dərhal cərimə protokolu tərtib olunur. AYNA xəbərdarlıq edir ki, analoji hallar intensiv xarakter daşıyır və sürücülər hər saat sonu gələn bildirişləri idarə etməklə maliyyə itkisinin qarşısını ala bilərlər. Hazırkı yanaşmaya görə, ödənişdə heç bir güzəşt edilmir və cərimə yalnız qurumun özündən qaynaqlanan texniki nöqsanlar olduqda ləğv edilə bilər.

Sürücülər üçün bu situasiya olduqca narahatdır, çünki sistemin avtomatik dayandırılması vətəndaşı “istəmədən qayda pozan” statusuna salır. Ödəniş etmək niyyətində olan sürücü, sadəcə 24 saatın tamamında tətbiqə daxil olub prosesi yeniləmədiyi üçün cərimələnir.