Nura Suri: “Həyatda o qədər haqsızlıqlar görmüşəm ki...”

“Hər bir insanın bu həyatda məqsədləri, arzuları olur. Mənim də arzularımın bəziləri həyata keçib, bəziləri isə artıq mümkünsüzdür - vaxtı keçib, düşüncələrim dəyişib. Bir çox insan uğur arxasınca gedir, karyerasında uca bildikcə ucalır. Amma məqsədlərimizə doğru və uğur arxasınca getdikcə nələri qurban veririk, özümüzdə hansı xüsusiyyətləri məhv edirik - heç bunları düşünmüsünüz? Mən də bir çox sənət adamı kimi belə edə bilərdim. Özümü, içimdəki yaxşı xüsusiyyətləri itirməmək üçün uğuru deyil, vicdanımı seçmişəm. Həyatda özümə edə biləcəyim ən böyük yaxşılıq - vicdanımın səsini dinləməyi, rəhm və mərhəmət hissini basdırmamağı, başqa insanlarda sevmədiyim xüsusiyyətləri  içimdə öldürməyi bacarmağımdır”.

 
Pravda.az-ın xəbərinə görə, bunu müğənni Nura Suri bildirib.
 
“Etdiyim bütün səhvlərdən nəticə çıxarıb öz üzərimdə, özümlə mübarizə edərək özümün ən yaxşı versiyamı yaratmağa çalışmağım məni güclü insan edib. Bu həyatda o qədər haqsızlıqlar görmüşəm ki, kənardan baxanlar bunu heç vaxt bilə bilməz, hiss etdirmərəm. Çünki yerimdə bir başqası tam fərqli, əclaf bir insana dönərdi. Bənzəmək istəmədim məni özlərinə bənzətmək istəyənlərə. Özümə bir insan olaraq fəxr edirəm, özümdən razıyam, çünki belə bir insan qalmağı bacardığım üçün çox qurbanlar vermişəm, vaxt sərf etmişəm. Qazana biləcəyim uğurları, maddiyyatı, çox şeyi qurban etmişəm, hətta düşmənlər də qazanmışam. Amma çox rahatam. Özüm özümlə tək qalanda vicdanım məni boğmur. Hətta mənə pislik edənlərə də kin və nifrət bəsləmirəm. Buna görə də özümə hörmətim var. Hər gün özümü daha yaxşı insan modeli etmək üçün öz üzərimdə çalışıram. Öldükdən sonra başqa dünya varsa, bu dünyadan ora özümlə aparmaq istəmədiklərim var. Bu səbəbdən də yorulmuram, sınmıram. Uğur qazanmaq asandır. İnsan qalmaq isə çətin. Mən çətin olanı seçdim”, - müğənni qeyd edib.