Fatma Mahmudova: “Xoşbəxtəm ki Rasim Balayevin əlinə əlim dəyib, ona salam vermişəm, qadınların ondan ötrü ürəyi gedirdi”

“Yeriyə bilmirdim, amma çətinliklə də olsa, Rasim Balayevin vida mərasiminə getdim. Çünki ora getməsəm, özümü bağışlaya bilməzdim. Çünki sənətkara səhnə verilmişdi. Sənətkar axırıncı rolunu oynamalı idi. Rasim Balayev axırıncı rolunu oynadı, ancaq heç kimin səsinə hay vermədi. Az qaldı, çıxam orada monoloq deyəm... Kaş mən xəstə olmazdım. Bu səhnə Rasim Balayevə verilib. İstədim deyəm ki, dur, sonuncu monoloqunu de, xalq səni gözləyir, niyə yatmısan? Dur, axırıncı dəfə Nəsimidən bir söz de, ey söz, sənət sahibi.  Tamaşaçı nə qədər gözlədi Rasim Balayev ayağa qalxmadı...İstədim deyəm, qalx mənim qardaşım, böyük sənətkarım, dur tamaşaçılar səni gözləyir, bir söz de...Azərbaycanın mədəniyyət, incəsənət, kino sənətinə çox ağır itki üz verdi. Rasim Balayev kimi dahi sənətkarı itirmişik”.

 
Bu sözləri Pravda.az-a açıqlamasında Xalq artisti Fatma Mahmudova bildirib.
 
Onun sözlərinə görə, çoxlarının özlərinə “sənətkar” deməyə ixtiyarları yoxdur, bundan sonra getsinlər özlərinə iş, peşə tapsınlar: “Sənət budur, sənətkar budur. Küçələr də insanlarla dolu idi. Camaat özləri gəlmişdi. Tənqidi fikirlə yanaşanlar qələt edirlər. O “İstiqlal” ordeni almışdı. Allah cənab Prezidentimiz İlham Əliyevin canını sağ eləsin, rəhmətlik ulu öndərimiz Heydər Əliyev də sənətə, sənətkara qiymət vermişdi, onun davamçısı cənab İlham Əliyev də dəyər verir. Ona verilən orden sənət və sənətkara verilən böyük qiymət idi. Rasim Balayev bəlkə ondan da yüksəklərə layiq idi. Onun kimi gözəl, şəxsiyyətli, yaraşıqlı harada idi? Mən onun gözəlliyini görmüşəm, qadınların ondan ötrü ürəyi gedirdi. Görün aktyor öz oyunu, ifası ilə tamaşaçını necə valeh etmişdi. Nəsimi deyəndə kimsə Nəsimini deyil, Rasim Balayevi fikirləşir. Nəsimi o zaman ölməyib, indi öldü. Vida mərasimində istədim deyəm ki, dur ayağa bundan belə səni nə kinoya çəkəcəklər, nə efirlərə dəvət edəcəklər, bundan sonra sənin gücün, qüvvətin, yaradıcılığın heç kimə lazım deyil. Yatırsan... Kimsə səni heç nəyə məcbur etməyəcək. Kimsə səni məcbur etməyəcək ki, Kinematoqrafçılar İttifaqının sədri vəzifəsində çalış. Əbədiyyətə qovuşmusan... Orada monoloqu söyləməyə sağlamlığım imkan vermədi. Adamın “Şöhrət”, “Şərəf”, “İstiqlal” ordeni də olar, ancaq sadəliyin, səmimiliyin özü bir gözəllikdir. O insan o qədər səmimi idi. Mən xoşbəxt aktrisayam ki, Rasim Balayevin əlinə əlim dəyib, ona salam vermişəm, salamını almışam. Baxmayaraq ki, mən özüm də Xalq artistiyəm, Rasim sənətin zirvəsində idi. Həmin zirvəyə çatmaq çətindir, amma o çatmışdı”.
 
F.Mahmudova vurğulayıb ki, Rasim Balayev dünya miqyaslı aktyor, böyük sənətkar olub: “Ölkələrin aktyorlarını gözünüzün qarşısına gətirin. Görün o yaraşıqda, əzəmətdə, gözəllikdə, baxışda bir aktyor var? Həm oyunu, həm ifası, təbiiliyi ilə sənətin zirvəsinə çatdı. İndi yerindən durana böyük sənətkar deyirlər. Elə deyil! Böyük sənətkar elə Rasim Balayev idi, aramızdan getdi. Mən onun ruhu qarşısında baş əyirəm. Heyf və təəssüf...  Əsərlərimizin qəhrəmanı idi. Elə ölənlər var ki, ölüsünün də paxıllığını çəkirlər. İnana bilmirdim ki, o dahi sənətkar rəhmətə gedib. Hələ onun yaşamağa haqqı var idi. Allah bilən məsləhətdir, nə yazıbsa, odur. Kim oynaya bilərdi onun canlandırdığı obrazları? Səsindəki əzəmət... Onun əruz vəznində dediyi şeirləri çıxıb kimsə deyə bilməz. Çoxu deyir mən də sənətkaram. Vallah, siz sənətkar deyilsiniz. Sənətkar o idi. Ölüm haqdır, ancaq öləndə də gərək mərifətli öləsən. Xalq səni sevə, evindən durub özünə borc bilə ki gedim sənətkarı yola salım. Allah cənab Prezidentimizin canını sağ etsin. Prezidentimizə, Mehriban xanıma, Mədəniyyət nazirimizə, sənət və sənətkara qiymət verib onu Birinci Fəxri Xiyabanda dəfn etdiyi, dahilərin yanında ona yer verdiyi üçün dərin təşəkkürümü, minnətdarlığımı bildirirəm. Allah Prezidentimizi bizə çox görməsin. Qurban olaram onlara. Ulu Öndər orada yatırsa, o torpaqda yatmaq da özü bir xoşbəxtlikdir. Həqiqi xoşbəxt sənətkardır ki, Ulu Öndərin yatdığı yerdə dəfn olundu. Gənc nəsillər də onu tanıyacaq ki, Azərbaycanda Rasim Balayev adlı belə sənətkar olub. Türkiyənin guya nə böyük aktyorları var? Ən gözəli Rasim Balayev idi. Mən ağır xəstəyəm. Orada hər şey ola bilərdi.  Başıma hər şey gələ bilərdi. Çünki yaxşı vəziyyətdə deyiləm. Amma buna baxmayaraq ölümümü də fikirləşmədim, dedim mən getməliyəm, bu, mənim borcumdur. Onunla dəfələrlə telefon danışığım olub, xoşbəxtəm ki, onun səsi qulağıma gəlib. Amma peşmanam ki, gərək onun səsini yazardım. Adamla necə mehriban, izzətlə, hörmətlə danışırdı. Adamlar var ki, elə-belə danışır. Görmüşəm də... Özünüzü nə üçün yuxarıdan aparırsınız? İnsanlığınız harada qaldı? Lovğlanmayın! Mən Xalq artistiyəm heç zaman lovğalanmamışam. Özümə görə sənətim, rollarım da var. 57 ildir sənətdəyəm heç zaman yuxarıdan getməmişəm. Ağac nə qədər bar verərsə başını aşağı salar...”