“Dünən “yumurtadan” çıxıb, Məhsətiyə “erotik” ləkə yaxanlar...”

“Dünən “yumurtadan” çıxıb özünü “rejissor” adlandıran birinin Azərbaycanın nəhəng tarixi şəxsiyyətinə, dünyaya meydan oxumuş, zəka və hünəri ilə Şərqin simasını dəyişmiş bir qadına erotik təsvirlər çəkməsi təkcə peşəkarlıq yoxluğu deyil. Bu, həmin şəxsin içindəki səviyyəsinin göstəricisidir. Demək ki, özü bu yolun yolçusudur, qulluqçusudur”.

Yenilik.az xəbər verir ki, bu sözləri Musavat.com-a açıqlamasında Xalq artisti, tanınmış kinorejissor-aktyor, Azərbaycan Respublikasının Kino Agentliyinin (ARKA) Bədii Şurasının üzvü Şeyx Əbdül Mahmudov deyib.

O, adı çəkilən filmlə tanış olmadığını deyib:

“Sözün düzü, mən sağlamlığımla bağlı məhdudiyyətlər səbəbilə ARKA-ya təqdim olunan filmlərə baxa bilmirəm, sadəcə ssenarilərlə tanış oluram. Yəni sözügedən filmə də baxmamışam. Amma bir həqiqət var ki, bunu tək mən yox, hamı bilir, Məhsəti Gəncəvi təkcə rübai ustası deyil, həm də Şərqin ilk qadın şahmat ustalarından biri, Azərbaycanı beynəlxalq səviyyədə təmsil edən, dövlət məsləhət şuralarında söz sahibi olan böyük zəkadır.

Bu gün bir çoxlarının adını belə çəkmədiyi, haqqında kifayət qədər araşdırma aparmadığı Məhsəti Gəncəvi, əslində, dünyada analoqu olmayan bir şəxsiyyətdir. O, yalnız poeziyamızın parlaq siması deyil, həm də böyük intellekt sahibi, yüksək mədəniyyət daşıyıcısı, nüfuzlu dövlət qadını, ailəsinə sədaqətli, mənəviyyatı uca bir şəxsiyyət kimi tariximizdə özünəməxsus yer tutur.

Məhsəti Gəncəvi nəhəngdir, həm düşüncəsi ilə, həm yaradıcılığı ilə, həm də qadın olaraq göstərdiyi cəsarəti və iradəsi ilə. Başqa ölkələr tarixlərini uydurma qəhrəmanlarla, saxtalaşdırılmış obrazlarla doldurur, çatlarını palçıqla örtüb özlərinə “şanlı tarix” yaradırlar. Biz isə əksinə, öz tarixi şəxsiyyətlərimizi qorumaq əvəzinə, onlara yaraşmayan münasibətlə, ucuz interpretasiyalarla, səviyyəsiz yanaşmalarla yaddaşımıza zərbə vururuq.

Mən o rejissorun adını ilk dəfə eşidirəm. Əbülfəz Qarayevin qızı olmur, rəhmətlik Qara Qarayevin özü belə bu cür filmlə gəlsəydi, ARKA o filmi heç vaxt qəbul etməzdi.

Məhsəti Gəncəviyə, Saray Xatuna, Mömünə Xatuna, Tomrisə, Aləmşahbəyimə, yəni tariximizin sütunlarına aşağılayıcı, çirkli, qeyri-etik, uydurma gözlə baxanlar sadəcə sifariş icra edənlərdir. Belələri nə sənətkardır, nə araşdırmaçı, nə də yaradıcı insan. Bu, əxlaqsızlıqdır, mənəviyyatsızlıqdır, başqa adı yoxdur”.

Qeyd edək ki, Mədəniyyət Nazirliyinin nəzdindəki Bədii Şura tərəfindən “Məhsəti” qısametrajlı bədii filminin Bakı Film Festivalında nümayişinə qadağa qoyulub. Qafqazinfo-nun məlumatına görə səbəb filmdə görkəmli şairə Məhsəti Gəncəvi gəzəyən əxlaqsız qadın kimi təqdim edilməsi olub.

Filmin rejissoru Suad Qaradır. O, sabiq mədəniyyət naziri Əbülfəs Qarayevin qızıdır.

Onu da xatırladaq ki, bu ilin may ayında adı çəkilən filmin XI Mammoth Lakes Film Festivalında (Kaliforniya) təqdim olunacağı haqda məlumat yayılmışdı. Qeyd olunurdu ki, filmdə baş rolları Fərqanə Abdulla, Cavanşir Sərdarlı, Elnur Musayev, Mələksima Məmmədova və İlqar Aydın ifa edirlər. Filmin operatoru Barbu Balasu, bəstəkarı Katya Yonderdir. Azərbaycan (“CİNEX prodakşn”) və Rumıniyanın (“MicroFilm” şirkəti) birgə istehsalı olan filmin prodüserləri Mariya İbrahimova və Ada Solomondur.