Bakının bu ərazisindəki yaşıllıqların köçürülməsinə rəy verilməsi məsələsinə baxılır — FOTOLAR

akı şəhəri, Suraxanı rayonu, Qaraçuxur qəsəbəsində planlaşdırılan yeni yaşayış kompleksinin ekoloji qiymətləndirilməsinə dair ictimai dinləmə keçirilib. 

Yenilik.az xəbər verir ki, tədbirdə “Günəşli İnşaat” MTK tərəfindən Əhməd Mehbalıyev küçəsi 5 ünvanında inşa olunması nəzərdə tutulan yaşayış və qeyri-yaşayış binalarının layihəsi üzrə müzakirə aparılıb.

Şirkət rəhbərliyi, dövlət qurumları əməkdaşlarının, ekoloqlar, QHT və KİV nümayəndələrinin, həmçinin sakinlərin iştirakı ilə təşkil olunan tədbirdə  layihənin ətraf mühitə mümkün təsirləri, ekoloji təhlükəsizlik tədbirləri və kompensasiyaedici yaşıllaşdırma məsələləri barədə ictimaiyyətə məlumat verilib. Layihə 1,2217 hektar torpaq sahəsinin bir hissəsində həyata keçiriləcək və baş plana uyğun olaraq A, B, C, F və M bloklarının tikintisi nəzərdə tutulur. Məlumata görə, A və B blokları bir girişli, 10 mərtəbəli yaşayış binaları olacaq. C bloku isə iki girişli, 10 mərtəbəli yaşayış binası kimi layihələndirilib. Layihə çərçivəsində yeraltı avtodayanacaqlar, qeyri-yaşayış sahələri, texniki infrastruktur obyektləri, su anbarları, nasosxana, transformator yarımstansiyası və məişət tullantıları üçün konteyner meydançası da inşa ediləcək.

Ərazidə geniş abadlaşdırma və yaşıllaşdırma işlərinin aparılması planlaşdırılır. Şəhərsalma sənədinə əsasən ümumi sahənin 25 faizi, yəni 4000 kvadratmetr ərazi yaşıllıq zonası kimi nəzərdə tutulur.

Qeyd olunub ki, tikinti sahəsinə bir neçə ağac və kol düşür və bu yaşıllıqlarla bağlı bütün prosedurlar Nazirlər Kabinetinin müvafiq qaydalarına uyğun şəkildə həyata keçiriləcək, layihə çərçivəsində kompensasiyaedici yaşıllaşdırma tədbirləri görüləcəkdir.

Tikinti prosesində atmosfer havasına emissiyaların azaldılması, səs-küyün minimuma endirilməsi, tikinti tullantılarının düzgün idarə olunması və mövcud yaşıllıqların qorunması əsas tələblərdən olacaq. Həmçinin daşınmalar zamanı tozlanmanın qarşısını almaq üçün nəqliyyat vasitələrinin yük hissələrinin örtülməsi tələb olunur.

İctimai dinləmədə layihə üzrə bütün sənədlər müzakirə olunub və irəli sürülən təkliflər nəzərə alınmaqla Dövlət Ekoloji Ekspertiza Agentliyi tərəfindən razılaşdırılıb. Qərara əsasən, tikinti işləri zamanı bütün ekoloji və sanitar tələblərə ciddi riayət olunmalıdır.