Sudan rəsmisi: WUF13-ün şüarı xalqımızın istəkləri və reallıqları ilə tam üst-üstə düşür

Sudan hökuməti və xalqı adından Ümumdünya Şəhərsalma Forumunun 13-cü Sessiyasına (WUF13) gözəl Bakı şəhərində ev sahibliyi etdiklərinə görə Azərbaycan hökumətinə və xalqına dərin təşəkkürümü bildirirəm. Biz xüsusilə belə bir mühüm şüar – “Dünyanın mənzillə təminatı: Təhlükəsiz və dözümlü şəhərlər və icmalar”, altında bir araya gəlmək fürsətinə görə minnətdarıq. Bu şüar Sudan xalqının reallıqları və istəkləri ilə tam üst-üstə düşür.

 
Bu barədə Sudan rəsmisi Birləşmiş Millətlər Təşkilatının Ümumdünya Şəhərsalma Forumunun 13-cü Sessiyası (WUF13) çərçivəsində "Milli Nazirlik Bəyanatları – Yeni Şəhərsalma Proqramının icra vəziyyətinə dair nazirlər səviyyəsində görüş"ündə deyib.
 
O bildirib ki, zəngin tarixə və böyük potensiala malik olan Sudan milləti hazırda üsyankar “Çevik Dəstək Qüvvələri” milislərinin təcavüzkar hərəkətləri nəticəsində kəskinləşən humanitar böhranla üz-üzədir.
 
“Bu təcavüz şəhər mərkəzlərimizdə böyük dağıntılara səbəb olub, canlı şəhərlərimizi fəlakət zonalarına çevirib. Yaşayış massivləri, səhiyyə müəssisələri, su və elektrik şəbəkələri, təhsil ocaqları daxil olmaqla mühüm infrastruktur sistemli şəkildə hədəfə alınıb və ağır zərər görüb. Bu milislərin mülki infrastrukturu hədəfə alması nəinki can itkilərinə səbəb olub, həm də şəhər həyatının strukturunu ciddi şəkildə sarsıdıb. Bu isə milyonlarla insanın didərgin düşməsinə, genişmiqyaslı yenidənqurma və bərpa işlərinə təcili ehtiyac yaranmasına gətirib çıxarıb. Bu dağıntıların miqyası millətimizin təhlükəsiz və dayanıqlı şəhər mühiti təmin etmək qabiliyyəti üçün böyük bir sınaqdır. Bu çətinliklərə baxmayaraq, Sudan hökuməti normal həyatın bərpasına və yenidən qurulmasına sadiqdir. Mənzil sahəsində Sudanda gənclər üçün “Bir milyon mənzil” layihəsinin yaradılması üzrə layihə təqdim edilib ki, bu layihə üzrə işlərə tezliklə başlanılacaq”, - deyə Sudan rəsmisi qeyd edib.