İki qurum Türkiyə və Polşada olan tələbələrimizi çarəsiz qoyub – ŞİKAYƏT

Türkiyədə və Polşada təhsil alan bir qrup azərbaycanlı tələbə Azərbaycandakı ali məktəblərə köçürülmək üçün dövlət qurumlarına müraciət ediblər.

Tribunainfo.az-a verilən xəbərə görə, onların bu müraciətinə müsbət cavab gəlməyib.
Bu şikayəti edən tələbələr – Nəriman Mirzəyev, Rasim Əlizadə, Alim Fərzəliyev və Orxan Salmanovdur. Belə ki, Təhsildə Keyfiyyət Təminatı Agentliyi onların akademik göstəricilərinə və keçid imtahanlarına dair arqumentlər irəli sürərək hüquqlarını tanımayıb.

Şikayətçi Nəriman Mirzəyevin sözlərinə görə, bir semester imtahanına 30 kredit düşür: “Mən Təhsildə Keyfiyyət Təminatı Agentliyinə sənədlərimi göndərdim və qəbul etdilər. Elm və Təhsil Nazirliyinə kreditlərimi göndərdim, onlar da qəbul etdilər. Amma sənədlərimə imtina verildi. Səbəb olaraq 90 kreditin olmasını qeyd etdilər. Mən də onlarla əlaqə saxladım və dedim ki, 1 il təhsil almışamsa, 90 krediti necə ala bilərəm?! Onlar da 1 ilə 90 kredit düşdüyünü bildirdi. Mən də qeyd etdim ki, 53 kreditim var”.
Şikayətçi deyib ki, qanunvericiliyin 2.2 maddəsinə əsasən, tələbənin 1/2 krediti varsa, transfer baş tuta bilir: “Operatora dedikdən sonra o, içəridə kimlə danışdısa, gəlib dedi ki, sizin 90 yox, 120 kreditiniz olmalıdır. Mən 1 il oxumuşamsa bir ilə necə 120 kredit toplaya bilərəm? Onlar da dedi ki, şikayətiniz varsa, gedin verin məhkəməyə. Burada tələbənin haqqı yeyilir. Mən kəsrə görə transfer etmirəm. Digər universitetdə təhsilim yaxşıdır. Sadəcə olaraq, Polşada viza və oturum almaq çətindir. Oturum üçün 30 min pul istəyirlər. Məndə o pul yoxdur”.

Türkiyədə təhsil alan Alim Fərzəliyev isə şikayətində vurğulayıb ki, YÖS nəticələri var: “Qanuna uyğun olduğu halda onu qəbul etmirlər. Mən də ölkəmdə təhsil almaq istəyirəm. Agentlik bundan səbəbsiz yerə imtina edir. Hər bir sənədim qanunauyğun halda olmağına baxmayaraq mənə imtina bildirişi gəlir”.

Türkiyə Giresun Universitetində təhsil alan Rasim Əlizadə şikayətində bildirib ki, “məndə belə bir problem var ki, qanunvericiliyə uyğun olaraq aldığım dərslərin yarısını keçmişəm. Amma mənə imtina gəlib. Səbəbini soruşduqda qeyd edirlər ki,” siz qanunvericiliyə uyğun gəlmirsiniz”. Amma mən bildirirəm ki, Təhsildə Keyfiyyətin Təminatı Agentliyindən 250 manata rüsum ödəyib şəhadətnamə almışam. Eyni zamanda aldığım dərslərin yarısını keçmişəm. Amma bildirirəm ki, siz nəyə görə 2 ildə 120 kredit toplamısınız? Nazirlər Kabinetinin qərarı var ki, əgər tələbənin akademik borcu varsa, bu mümkündür. Onlar da bildirir ki, “Nazirlər Kabinetinin qərarı bizə aid deyil, bizi maraqlandırmır. Gedin, məhkəməyə verin”.
Onu da deyək ki, tələbələrə başqa bir əsassız rədd cavabı da təqdim olunub. Əksəriyyəti 2023-cü ildə Türkiyənin dövlət universitetlərinin təşkil etdiyi YÖS imtahanında yüksək nəticə göstərərək qəbul olunublar. Daha sonra – 2023-cü ilin dekabrında qüvvəyə minmiş qanuna əsasən, yalnız vahid TR-YÖS imtahanı etibarlı hesab olunur. Lakin həmin tələbələr imtahanı bu qanun qüvvəyə minməmişdən əvvəl – 2023-cü ildə vermişdi.
Türkiyə Ali Təhsil Şurası da öz qərarında bildirib ki, yalnız 2024-cü ildən sonra vahid imtahan keçiriləcək. Agentlik isə bu faktı nəzərə almadan, geriyə tətbiq prinsipi ilə hərəkət edib. Aidiyyatı qurumların cavabını dərc etməyə hazırıq.