"Bu təklifin reallaşması yaxşı müəllimlərin sistemdən sıxışdırılıb çıxarılmasına səbəb ola bilər" - AÇIQLAMA

"Müasir tələblərə cavab vermək, fənn üzrə daha dərin biliyə sahib olmaq üçün magistr təhsili yaxşıdır. Yeniliklər müəllimlərdən dərin bilikli olmağı tələb edir".

Bu fikirləri Redaktor.az-a təhsil eksperti Rizvan Fikrətoğlu gələcəkdə orta məktəb müəllimlərinin öz ixtisasları üzrə magistr dərəcəsinə sahib olmalıdırlar təklifinə münasibət bildirərkən dedi. Onun fikrincə, magistr təhsili müəllimlərə geniş imkanlar yaradır:
"Ümumiyyətlə, magistr təhsili müəllimə yalnız pedaqogika deyil, eyni zamanda öz ixtisası üzrə elmi-nəzəri bazanı daha yaxşı mənimsəməyə kömək edir. Finlandiya, Sinqapur kimi ölkələrdə orta məktəb müəllimi işləmək üçün ən azı magistr təhsili olmalıdır. Dediyim ölkələrdə orta təhsil göstəriciləri yüksəkdir. Biz beynəlxalq təcrübədə olan müsbət halları görürük. Magistratura təhsili avtomatik olaraq yaxşı müəllim olmaq anlamına gəlmir. Bəzi hallarda müəllim pedaqoji bacarıqdan çox nəzəri bilik qazanır, bu da sinif şəraitində effektiv olmaya bilər. Həm də bu, təhsil və maliyyə yükü yaradır. Müəllimlərin çoxu gənc yaşda fəaliyyətə başlayır. Onların ailə, yaşayış, iş yeri kimi qayğıları olur".

Müsahibimizin sözlərinə görə, yalnız magistr dərəcəsi olanlara üstünlük verilməsi digər yaxşı müəllimlərin sistemdən sıxışdırılıb çıxarılmasına səbəb ola bilər.
"Mənim fikrimə qalsa, deyərdim ki, hə, magistr təhsili olsun. Amma bu, məcburi şəkildə yox, hissə-hissə, məqsədyönlü şəkildə olmalıdır. Magistr dərəcəsi karyera yüksəlişi və ixtisasartırma üçün önəmli meyar ola bilər. Lakin bütün müəllimlər üçün şərtsiz tələb kimi qoyulması, deyərdim ki, real vəziyyətə uyğun deyil. Halbuki mən də tərəfdarıyam. Müəllimlərin inkişafı üçün təlimlər, konfranslar keçirilə bilər. Ümumiyyətlə, beynəlxalq təcrübədə müəllimin elmi dərəcəsində əsasən magistraturadan danışırıq. Dünyada tendensiya belədir ki, magistr dərəcəsi bəzi ölkələrdə şərtdir, bəzilərində isə təşviq olunur və üstünlük sayılır", - deyə təhsil eksperti bildirdi.