“Müəllim” sözünü düzgün yaza bilməyənlərlə sağollaşmışıq” - Emin Əmrullayev

“İnanıram ki, son 10 ildə müəllimlərimizin keyfiyyəti əsaslı şəkildə artıb”.

Yenilik.az xəbər verir ki, bunu elm və təhsil naziri Emin Əmrullayev “Real TV”yə müsahibəsində deyib.
Onun sözlərinə görə, sözügedən məsələ həm diaqnostika, həm sertifikatlaşdırma prosesində, həm də işə qəbul olan müəllimlərin keyfiyyətində görünür:
“Bizim yüzlərlə dil və ədəbiyyat, riyaziyyat, tarix, biologiya müəllimimiz var ki, onlar qəbul imtahanlarında 500-dən çox bal toplayıblar. Bu da o deməkdir ki, bizim gələcək müəllimlərimizin diplomları yerindədir, saxta deyil. Çünki saxta diplomlu, “müəllim” sözünü düzgün yaza bilməyən müəllimlərdən danışırdıq ki, artıq onlarla da artıq sağollaşmışıq”.
O bildirib ki, indi daha rəqabətli bir iş yerindən danışılır:
“Məsələn, hazırda Bakıda bir müəllim yeri üçün bir neçə yüz nəfər namizəd yarışır və yalnız biri seçilirsə, bu, artıq yaxşı xəbərdir. Bəli, bu, çətindir, çünki yüz nəfərdən biri seçilir, 99-u isə seçilmir. Təbii ki, uğur qazanmayanda proses bəyənilmir. Rəqabət olan yerdə inkişaf da olur”.
Nazir söyləyib ki, yeni nəsil müəllimlərin səviyyəsi sertifikatlaşdırma nəticələrində də görünür:
“Son 5 ildə işə qəbul olunan müəllimlərin imtahandakı orta nəticəsi 25 il və daha çox pedaqoji stajı olan müəllimlərin orta nəticəsindən 2,5 dəfə yüksək olub. Bu da nəticəni aydın şəkildə göstərir. Bu, o demək deyil ki, yaşlı müəllimlərimiz zəifdir, yox. Bu illər ərzində baş verən obyektiv səbəblər təhsilə təsir edib. Bizim keyfiyyət, işə qəbul sistemlərimiz problemli olub. Bu adamlar hələ də işləyirlər və bir qismi ilə əmək müqaviləsinə xitam vermişik. Bəziləri təkmilləşsə də, bəziləri bunu bacarmayıb. Görünən odur ki, bu sahədə daha istedadlı insanlar müəllimlik ixtisasını seçirlər”.