Mediasiya təlimçilərinə sertifikatlar təqdim edilib.

17 noyabr 2023-cü il tarixində Mediasiya təlimçilərinə sertifikatlar təqdim edilib. Xatırladırıq ki, sertifikatlar 5 oktyabr 2023-cü il tarixində Avropa Şurası, Avropa İttifaqı, Mediasiya Şurası və Azərbaycan Respublikası Ədliyyə Nazirliyinin Ədliyyə Akademiyasının təşkilatçılığı ilə Yaxşı İdarəçilik üçün Tərəfdaşlıq Proqramı III (PGG III) “Azərbaycanda mediasiyanın təşviqi” layihəsi çərçivəsində CEPEJ-in mediasiya üzrə təlimçilər üçün təkmilləşdirilmiş təlimlərin nəticələrinə uyğun olaraq təqdim edilib.

Təqdimat mərasimində çıxış edən Mediasiya Şurası İdarə Heyətinin sədri Nadir Adilov milli təlimçilərin beynəlxalq təcrübə və ən yaxşı metodlar əsasında bilik və bacarıqlarının inkişaf etdirilməsinin hər zaman Mediasiya Şurasının diqqət mərkəzində olduğunu qeyd edib. O qeyd edib ki, bu gün ölkəmizdə artıq kifayət qədər bilik və bacarıqlara malik milli mediasiya təlimçiləri var. Avropa Şurası və Avropa İttifaqı tərəfindən isə mediasiya təlimçilərinin müasir standartlar çərçivəsində bilik və bacarıqlarının artırılmasına dəstək çox mütərəqqi bir addımdır. 
Çıxış edən Ədliyyə Akademiyasının proroktoru Elçin Xələfov qeyd edilən təlimlərdə iştirak edib, müvafiq sertifikatlar alan təlimçiləri təbrik edib və Ədliyyə Akademiyası və Mediasiya Şurası arasında olan səmərəli əməkdaşlıq məsələləri barədə fikirlərini bildirib. O qeyd edib ki, artıq keçən müddət ərzində mediasiya təlimçilərinin təkcə nəzəri deyil, eyni zamanda praktik sahədə də bilik və bacarıqları artıb və bu mediasiyanın inkişafı sahəsində mühüm amildir. 
Təqdimat mərasimi mediasiya təlimçilərinə Ədliyyə Akademiyasının prorektoru Elçin Xələfov, Mediasiya Şurası İdarə Heyətinin sədri Nadir Adilov və Azərbaycan Respublikasının Qeyri – Hökumət Təşkilatlarına Dövlət Dəstəyi Agentliyinin icraçı direktoru Aygün Əliyeva tərəfindən sertifikatların təqdim edilməsi və təlimçilərin fikir mübadiləsi ilə davam edib.