“Bolt”un fəaliyyəti dayandırılacaq? - AÇIQLAMA

Xəbər verdiyimiz kimi, dünən Bakıda "BYD" markalı avtomobil Ələsgər Qayıbov küçəsindən sürətlə hərəkət edərək Heydər Əliyev prospektinin kənar yolunu kəsdiyi beton maneəni dağıdaraq prospektin əsas hissəsinə düşüb. 

Qəzaya səbəb olan avtomobilin sürücüsü ilə bağlı bəzi məlumatlar əldə edilib. "BYD" markalı avtomobilin sürücüsünün ayağında elektron qolbaq olub. Onun azadlığı Cinayət Məcəlləsinin 178-ci maddəsinə əsasən (dələduzluq) məhdudlaşdırılıb. O da məlum olub ki, sürücü avtomobili başqa bir şəxsin adından qeydiyyatdan keçərək idarə edib. 
Qeyd edək ki, bu cür hallar "Bolt" şirkətində tez-tez rast gəlinir. Belə ki, bir çox hallarda sərnişinlər taksi sifariş edərkən tətbiqdə göstərilən avtomobil və sürücü ilə rastlaşmırlar ki, bu da bir sıra narazılıqlara səbəb olur. Bəs görəsən, baş verən son hadisə “Bolt”un Azərbaycandakı fəaliyyətinin məhdudlaşdırılması ilə nəticələnə bilərmi? 
Mövzu ilə bağlı Yenisabah.az-a danışan nəqliyyat məsələləri üzrə ekspert Eldəniz Cəfərov bildirib ki, sözügedən şirkətin fəaliyyətinin dayandırılması real görünmür:
“Düşünmürəm ki, bu hadisədən sonra həmin taksi şirkətinin fəaliyyəti Azərbaycanda dayandırılsın. Amma müəyyən tədbirlər görülə bilər. Həmin şirkətə qarşı sanksiyalar tətbiq edilə bilər”.
Sosial-strateji Tədqiqatlar və Analitik Araşdırmalar İctimai Birliyinin sədri İlqar Hüseynli isə qeyd edib ki, yekun araşdırma edilmədən “Bolt” şirkətini günahlandırmaq düzgün deyil:
“Bu sürücülük məsələsi individual məsələdir. Burada “Bolt” şirkətinin hər hansı sürücü ilə hüquqi münasibətlərini araşdırmaq lazımdır. Mənə elə gəlir ki, üzərində məhkumluq olan, şərti azadlığa buraxılmış şəxsin taksi fəaliyyəti ilə məşğul olmasında hər hansı bir məhdudiyyət yoxdur. Əgər həmin məhkumluq onun birbaşa sürücülüyə bağlı olan cinayəti ilə əlaqəli deyilsə. 
Tutaq ki, qəza törədib adam öldürməyibsə, qəza törədib kütləvi insan tələfatına səbəb olan hadisə törətməyibsə və s. Qanunvericiliyə əsasən, şərti azadlığa buraxılıbsa, bu insanın hüquqdur ki, işləyib çörək qazansın. Bunu sürücülüklə də edə bilər, fəhləliklə də edə bilər. Yəni burada bölücülük eləmək düzgün deyil. Bu düşüncəni tamamilə kənara qoymaq lazımdır. Qəzanın səbəbləri araşdırılmalıdır. 
Sürücü əgər qəzanı törətdiyi anda anlaqsız vəziyyətdə olubsa, anın özünü qiymətləndirmək lazımdır. Ona uyğun məhkəmə qərar verə bilər ki, sürücüyə hansı cəza tətbiq edilsin. Bəlkə elə sürücünün qəfil ürəktutması yaranıb? Yaxud hansısa ağır xəstəliyi var? Sürücü də bir insandır. Mənə elə gəlir ki, bu məsələdə kütləvi olaraq, sürücünü və ya şirkəti günahlandırmaq üçün araşdırmanın nəticəsini gözləmək lazımdır. Əgər doğrudan da şirkət işəgötürməni həyata keçiribsə, təbii ki, sağlamlıq haqqında arayış almalıdır. Hər bir işçini sağlamlıq arayışı ilə işə götürürlər. Əgər “Bolt” həmin işçini bu qaydada işə götürübsə, şirkətin hər hansı bir məsuliyyəti yoxdur. “Bolt” şirkətinin 1 sürücüyə görə fəaliyyətini dayandırmaq, ona qarşı “səlib yürüşünə” qalxmağın tərəfdarı deyiləm”.