İmtahanda ən yüksək balları onlar toplayıb

II və III ixtisas qrupları üzrə qəbul imtahanının nəticələri açıqlanıb.

Yenilik.az Dövlət İmtahan Mərkəzinə (DİM) istinadən xəbər verir ki, Sumqayıt və Saray qəsəbəsindən olan abituriyentlər ölkə üzrə ən yüksək nəticə göstərənlər sırasında yer alıblar.
Sumqayıt şəhər 35 nömrəli tam orta məktəbin məzunu Zamin Kərimov II ixtisas qrupu üzrə hər iki mərhələnin nəticələrinin cəminə əsasən 690 bal toplayaraq qrup üzrə ən yüksək nəticənin sahibi olub. O, qəbul imtahanının birinci mərhələsində 297,5, ikinci mərhələsində isə 392,5 bal toplayıb.
III ixtisas qrupu üzrə isə Sumqayıt şəhəri Təbiət Elmləri Təmayüllü Gimnaziyanın məzunu Əli Məmmədzadə və Saray qəsəbə 1 nömrəli tam orta məktəbin məzunu Orxan Mənsimli ikinci mərhələdə maksimum nəticə – 400 bal əldə ediblər.
Əli Məmmədzadə birinci mərhələdə topladığı 289,6 bal ilə birlikdə ümumilikdə 689,6 bal toplayaraq III ixtisas qrupu üzrə ölkənin ən yüksək nəticəsini göstərən abituriyent olub. Orxan Mənsimli isə birinci mərhələdə 276,1 bal toplayıb.
Qeyd edək ki, DİM-in məlumatına görə, II və III ixtisas qrupları üzrə keçirilən imtahanda ümumilikdə 41.623 nəfər iştirak üçün qeydiyyatdan keçib.