Dövlət qulluğuna qəbul imtahanında hüquqa zidd addımlar atılıb?

Qanunvericilik fənni üzrə tanınmış müəllim Turan Məmmədlinin may ayında dövlət qulluğuna qəbulla bağlı keçirilən imtahanlarda Dövlət İmtahan Mərkəzi tərəfindən hüquqa zidd addımlar atılması barədə açıqlaması gündəm olub.

 
T.Məmmədli imtahanda iştirak edən şəxslərin bir qisminə əvvəllər sosial şəbəkələrdə geniş müzakirə olunan, əvvəlki imtahanlara salınmış, hər kəsin bildiyi sual nümunələrinin təqdim olunduğunu, bununla da yüksək sertifikat əldə etdiklərini iddia edib.
 
“Bu isə imtahanlarda iştirak edən digər şəxslərlə münasibətdə bərabərlik prinsipinin pozulması üçün əsaslardan biridir. İmtahanların ədalətli, şəffaf, operativ həyata keçirilməsini təmin etməli olan qurum — DİM bu hüquqa zidd əməlləri ilə onların yüksək sertifikat əldə etmələrinə səbəb olub. Bu, növbəti mərhələlərdə, müsahibələrdə digər şəxslərin hüquqlarının daha da pozulmasına səbəb olacaq. Belə ki, yüksək sertifikat əldə etmiş namizədlər müsahibə mərhələsində ilk olaraq dövlət qulluğuna qəbul imkanı əldə edir. Bu məsələlərin belə formada əks olunması göstərir ki, DİM imtahanlarda müəyyən kateqoriyalı şəxslər üçün müəyyən formalı sual nümunələri təqdim edərək, onların sertifikat əldə etmələrinə səbəb olub. DİM hüquqa zidd əməllərinə son qoymalı, bu məsələ ilə əlaqədar izahat verməlidir. Bildirməlidir ki, nə üçün sosial şəbəkələrdə kifayət qədər müzakirə olunan, “Youtube” və digər sosial platformalarda əks olunmuş sualları həmin namizədələrə təqdim edərək onların yüksək sertifikat əldə etmələrinə səbəb olub?” - o bildirib.
 
Turan Məmmədlinin fikirlərinə sosial şəbəkələrdə dəstək şərhləri yazılıb.
 
Məsələ ilə bağlı Pravda.az DİM-ə sorğu ünvanlayıb.
Pravda.az