Laçın hava limanı erməniləri qorxuya salıb

Ötən gün Azərbaycan daha bir tarixi hadisəyə şahidlik edib.

Yenilik.az xəbər verir ki, işğaldan azad edilmiş Laçın şəhərində yeni hava limanının istifadəyə verilməsi prosesi baş tutub.
Bildirək ki, yeni aeroportun açılışında Azərbaycan Prezidenti İlham Əliyev, Türkiyə prezidenti Rəcəb Tayyib Ərdoğan və Pakistanın baş naziri Şahbaz Şərif iştirak ediblər.
Amma görünən odur ki, Laçın hava limanının işə düşməsi erməniləri ciddi şəkildə qorxuya salıb. Erməni hərbi ekspert Hayk Nahapetyan iddia edib ki, “Laçında aeroportun inşası Ermənistan üçün təhlükə yarada biləcək birinci dərəcəli strateji əhəmiyyətə malikdir”.
Onun bir başqa iddiası da budur ki, guya, Qarabağda inşa edilən hava limanları mülki təyinatlı deyil. “Bunlar mülki sərnişin daşımalarına xidmət edən hava limanları deyil. Onlar ilk növbədə hərbi əhəmiyyət kəsb edir”.
Nahapetyan özünün “dərin” təhlilləri nəticəsində belə qənaətə gəlib ki, Qarabağdakı hava limanları guya, Ermənistan və İrana qarşı nəzərədə tutulub. “Azərbaycanın Qarabağda tikdiyi hava limanları həm Ermənistan, həm də İran istiqamətində sürətli hərəkət, sursat və ağır texnikanın daşınması üçün platforma rolunu oynaya bilər”.