Həmin kursla müqaviləyə xitam verildi - Video - Yenilənib

Lənkəran şəhərində yerləşən “Kaspi kids” məktəbəqədər hazırlıq kursunda müəllim azyaşlı şagirdə şiddət göstərib.

Yenilik.az Cenublu.az-a istinadən xəbər verir ki, sosial şəbəkələrdə yayılan görüntüdə müəllim uşağı qəfil yerindən qaldırır, digər azyaşlını su qabını əlində tutmağa məcbur edir. Ardından məhz onun əli vasitəsilə uşağın başına zərbə endirir.
Məlumata görə, hadisə nəticəsində uşaq baş nahiyəsindən xəsarət alıb.
DİN-in Mətbuat xidmətinin Lənkəran regional qrupundan “Qafqazinfo”nun sorğusuna cavab olaraq bildirilib ki, hazırda məsələ ilə bağlı Lənkəran Şəhər Rayon Polis Şöbəsində təhqiqat araşdırması aparılır: “Tərəflərin ərizə və izahatları alınıb, azyaşlının məhkəmə tibbi ekspertizadan keçirilməsi təmin edilib. Araşdırmanın nəticəsindən asılı olaraq məsələyə hüquqi qiymət veriləcək”.
***
Lənkərandakı “Kaspi Kids” məktəbəqədər hazırlıq mərkəzində baş verən hadisə ilə bağlı Kaspi Təhsil Şirkəti açıqlama verib:
“Lənkəran bölgəsində fəaliyyət göstərən təhsil müəssisəsində baş vermiş xoşagəlməz halla bağlı video paylaşılıb. Bu hadisə bizi son dərəcə məyus edib və dərin narahatlıq doğurub.
Məlumat vermək istərdik ki, məktəbəqədər hazırlıq xidməti təqdim edən həmin müəssisə “Hirkan Hazırlıq Kursu” MMC tərəfindən idarə olunur. “Hirkan Hazırlıq Kursu” MMC, “Kaspi Kids” brend adından istifadə üçün françayzinq müqaviləsinə əsasən rəsmi icazə ilə fəaliyyət göstərir. Françayzinq, bölgələrdəki kiçik sahibkarlıq subyektlərinə dəstək vermək üçün tətbiq etdiyimiz biznes modelidir.
Diqqətinizə çatdırırıq ki, bu kimi hallar təhsil müəssisəsinin prinsiplərinə və dəyərlərinə tamamilə ziddir. Bu səbəblə baş verən hadisə dərhal araşdırılmış, “Kaspi Kids” brendinin təhsil keyfiyyəti prinsiplərinə uyğun fəaliyyət göstərmədikləri üçün “Hirkan Hazırlıq Kursu” MMC-nin françayzinq müqaviləsinə xitam verilib. Çünki, bu cür xoşagəlməz, pedaqoji prinsipimizə sığmayan hallar “Kaspi Təhsil Şirkəti”nin fəaliyyət prinsiplərinə ziddir”.