“Azercell” boykot edildi: “Simurq quşu saxlayın, xəbərləşmək üçün üç tel yandırın...”

“Azercell”in elektron ödəniş üsulları vasitəsi ilə həyata keçirilən ödənişləri iyulun ayının 1-dən etibarən kəskin artıracağı barədə qərarı sosial şəbəkələrdə etirazla qarşılanıb. Şirkət müəyyən etdiyi yeni qiymətlərə görə boykot edilib.

 
Yenilik.az xəbər verir ki, “Azercell”in addımını boykot edənlər arasında partiya sədrləri, ekspertlər, media nümayəndələri və digər ictimaiyyət üzvləri də az deyil.
 
Şirkətin qərarına yazılan etirazlardan bir neçəsini təqdim edirik:
 
“30 manat yüklə, xətt 30 gün açıq qalsın. Atamın telefonu elə 25 manatlıq “prostoy” telefondur”
 
““Azercell”, sizi kimlərlə müqayisə edək?! Əlaqə var, amma ədalət yox! Qonşuda limitsiz internet, bizdə limitli səbir!”
 
“Adınızı dəyişin, “Diləncell" edin, onsuz da özbaşına qurumsunuz”.
 
““Azercell”i rayon yerlərində işlədirlər, minumum əməkhaqqı ilə...”
 
“Hamı birdəfəlik “Azercell”dən imtina etsin. Qoy təkcə şirkətin müdiri və işçiləri istifadə etsinlər. Bunlar əhalini sıxmaqla varlanmaq istəyirlər”.
 
“25 il “Azercell”in abunəçisi olmuşam. Heyif o 25 ildən. 2 aydır nömrəyə kontur vurmuram, çıxmışam bu dilənçilərin şirkətindən”.
 
“Hamısı rəqabətsizliyə görədir. Fürsət bilib, üstünə qoyublar. Minimal əmək haqqı 400 AZN-dir, 25AZN istəyirlər ki, xətt 25 gün - heç 1 ay da yox, açıq qalsın. Ukrayna və Rusiya mobil operatorları bazara girsə, bunlar ya müflis olacaq, ya da məcbur qalıb münasib qiymətlərə enəcəklər”.
 
“Gün o gün olsun, beynəlxalq operatorlar qurulsun və “Azercell” kimi dələduz şirkətlərdən insanlar qurtulsun. Bunlar açıq-aşkar soyğunçuluqla məşğuldurlar”.
 
 “Boykot! Gələn aydan ailəlikcə “Azercell”dən imtina edəcəyik. Hər kəs 2002-yə zəng vurub, irad bildirsin. Mən bildirdim. Boykot kompaniyasını da hər gün aktiv saxlayaq”.
 
““Azercell”, nömrənizi qırıb atdım, sağ olun!”
 
““Azercell”sosial şəbəkələrdə qiymətləri artırdığı üçün boykot olunur. Haqlısınız, bu qədər baha internet və danışıq qiymətləri olmaz. Üstəlik, kontur üçün kağız istehsalı, çap və digər xərclər minimuma endirildiyi halda danışıq qiymətlərinin bu qədər baha olması düzgün deyil”.
 
““Azercell” çox yerində qərar qəbul edib. Dəstəkləyirəm! Telefon işlətmək varlıların işidir. Pulun yoxdursa, kasıbsansa, telefon işlətmək nə məcburdur axı? Simurq quşu saxlayın, xəbərləşmək üçün üç tel yandırın, vəssalam. Məktub da yaza bilərsiniz. Qələm 50 qəpik, kağız-dəftər isə 1 manat edir. Ayda cəmi 1.5 manatla məsələni həll etmək mümkündür...”Pravda.az