Deputat “Azercell”i tənqid etdi: “Milyonlarla istifadəçisi var, amma böyük məbləğlərlə qazanmaq üçün hər şeyi hesablayıb”

““Azercell” mobil operatorunun 1 iyul tarixindən etibarən fakturasız istifadəçilər üçün yeni şərtlər tətbiq edəcəyi ilə bağlı açıqlamasından görünür ki, “Azercell” “müştəri yönümlü” deyil, “yalnız gəlir gətirən müştəri” yönümlü siyasətə üstünlük verib. Yeni qaydalardan sonra artıq 1–2 manat balans yükləməklə insanlar nömrə xəttini aktiv saxlaya bilməyəcəklər. Əvvəlki sistem azgəlirli və yalnız əlaqə üçün nömrə saxlayan insanlara, xüsusilə bölgələrdə yaşayanlara müəyyən rahatlıq təmin edirdi. Əgər indiyədək 5 manat ödəyib, 1 ay aktiv nömrə işlətmək, yəni kiməsə zəng etməklə danışmaq mümkün idisə, indi təklif olunan qaydalara görə, bu 5 manatla  vətəndaşın nömrəsi yalnız 5 gün aktiv olacaq, hətta balansda pul olsa da, danışmaq mümkün olmayacaq. Şirkət yeni qiymət siyasətində balanssız nömrələrin qarşısını almaq, daha aktiv istifadəçi davranışı yaratmaq və daha çox kontur yükləmə stimulu yaratmaq niyyətindədir. Yəni pulun, balansın varsa, nömrən aktiv olacaq, yoxsa nömrən bağlanacaq”.

 
Bu sözləri Pravda.az-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Müşfiq Cəfərov deyib.
 
“Tarifə qoşulanlar üçün isə vəziyyət tam başqadır. Tarifiniz varsa, yalnız o tarifin tam haqqını yüklədikdə nömrəniz 30 gün açıq qalacaq. Tarifə qoşulmamısınızsa, balansa 1 və ya 2 manat yükləsəniz, heç bir resurs aktivləşməyəcək, nömrə də cəmi 1-2 gün açıq qalacaq.  Mənə görə, digər ciddi məsələ “Azercellim”, “Bölgə”, “GəncSim”, “Sadə6” və digər az da olsa, sərfəli tariflərə yeni qoşulmaların dayandırılmasıdır. Beləliklə, “Azercell” həm də istifadəçilərin seçim imkanlarını məhdudlaşdırır, bazar daxilində “məcburi edilən” yeni modellərə keçir. Milyonlarla istifadəçisi olan şirkət kiçik məbləğlərlə deyil, böyük məbləğlərlə qazanmaq üçün hər şeyi hesablayıb. Digər tərəfdən, bu, rəqəmsal bərabərsizlik və əlçatanlıq baxımından ciddi geriləmədir. “Azercell” şirkətinin bu addımı dolayısı ilə rəqəmsallaşmaya da mənfi təsir göstərəcək. Ümid edirəm ki, dövlət şirkəti olan “Azercell” tarif qaydalarına yenidən nəzərə salmalı, “1 manat – 1 gün” prinsipi ləğv edilməli, daha münasib tariflər müəyyən etməlidir. Xatırladıram ki, qonşu ölkələrin heç bir mobil operatorunda belə sərt yanaşma yoxdur”, — deputat bildirib.