DİQQƏTLİ OLUN! “Kontakt Home” müştəriləri belə aldadır – Detallar

“Kontakt Home” mağazalar şəbəkəsinin daha bir müştərisi aldadıldığını iddia edir. Günel Mustafayeva adlı vətəndaş Feysbukda başına gələn hadisəni ictimailəşdirib.

Tribunainfo.az xəbər verir ki, şikayətçinin sözlərinə görə, 7 iyul 2024-cü ildə “Kontakt Home”un Dəniz Mall filialından Lenovo Ideapad 3 model noutbuk alıb. Satışdan sonra ona cihazın FreeDOS – yəni əməliyyat sistemi olmayan vəziyyətdə olduğu bildirilib. Əməkdaşlar yalnız onların yazdığı Windows-un “rəsmi və təhlükəsiz” olduğunu qeyd ediblər. Bu səbəbdən Günel Mustafayeva əlavə olaraq 319.99 manat ödəyərək Windows 11 Home sisteminin yüklənməsinə razılıq verib.
Lakin yaxın zamanda noutbuka texniki baxış keçirən müştəri, sistemin əvvəldən zavoddan Windows 11 Home OEM lisenziyası ilə aktivləşdirildiyini aşkarlayıb. Kompüterdəki lisenziyanın “activated with a digital license” statusunda olması və Product ID-nin “AAOEM” ilə bitməsi sistemin artıq qurulmuş və rəsmi Windows ilə gəldiyini sübut edir.
“Sadəcə sistemi silib, yenidən yazaraq mənə təkrar satıblar. Mən bu texniki detalları bilmədiyim üçün onların dediyinə inandım. İndi isə məsuliyyəti üzərimə atıb deyirlər ki, razılıq verdiniz, artıq keçib, pul qaytarılmır”, – deyə şikayətçi bildirib.
Günel Mustafayeva bildirir ki, əgər doğrudan da kompüter FreeDOS olubsa və ona yeni Windows Retail açarı yüklənibsə, bunu rəsmi sənədlə sübut etməyə hazırdır. Lakin əks halda, artıq olan sistemə görə vətəndaşdan bir daha ödəniş alınması istehlakçı hüquqlarının pozulması kimi qiymətləndirilməlidir.
Qarşı tərəfin mövqeyini işıqlandırmağa hazırıq.
Gülşən Rəsul