Müəllimdən Emin Əmrullayevlə bağlı SƏRT sözlər – “O heç nəyi həll edə bilmir”

Keçən ilin noyabr ayının 29-da Elm və təhsil naziri Emin Amrullayevin qəbulunda oldum. Nazirə dedim ki, dövlət qulluğu vəzifələri vakansiyaya çıxarılmır və orada müddətli şəkildə kimlərsə işləyir. Elm və Təhsil nazirliyinə tabe olan strukturda yüzlərlə dövlət qulluğu vəzifəsi var. Nazir dedi ki, yaxın günlərdə bütün dövlət qulluğu vəzifələri vakansiyaya çıxarılacaq və siz də müsahibədə iştirak edə bilərsiniz. Üzərindən 8 ay keçir. Dövlət qulluğu vəzifələri vakansiyaya çıxarılmadı, çıxarılmır…

Tribunainfo.az xəbər verir ki, bu sözləri nazirin qəbulunda olan müəllim Alim Həmidli bildirib. Problemini Feysbukda ictimailəşdirən şikayətçi qeyd edib ki, onsuz da nazir heç bir problemi həll etmir:
“Bəzən burada istər Azərbaycan dili və ədəbiyyatı, istər kimya müəllimlərinin, istərsə də digərlərinin Emin Əmrullayevdən həddən artıq çox gözləntilərinin olduğunu, bu adamdan çox şey gözlədiklərinin şahidi oluram. Bir qrup adam nədənsə nazirə çox inanır, problemlərinin ciddi şəkildə bu şəxs tərəfindən həll ediləcəyinə sidq ürəkdən inanır.
Bu qədər saf, inanclı kütlənin qarşısında hər üç-dörd aydan bir müsahibə vermək adı ilə çıxıb, onları əzməyə çalışan naziri tanıya bilməyənlərin məncə öz hallarına ağlamaqdan başqa heç bir şansları yoxdur”.