“Leqo Group” bir gündə iki tender udub

“Lego Group” MMC bir gündə iki tenderin qalibi olub.

Tribunainfo.az xəbər verir ki, bu barədə açıq mənbələrdə məlumat yayılıb.
Bildirilir ki, həmin tenderlərdən biri İnnovasiyalar Mərkəzinin olub. Belə ki, Mərkəz şirkətdən 48 min 412 manatlıq promo materialları satın alıb.
Şirkətin udduğu ikinci müsabiqə isə Bakı Slavyan Universitetinin keçirdiyi tender olub. Universitet MMC-dən 100 min 4 manatlıq dəftərxana və təsərrüfat malları  satın alıb.
Tribunainfo.az-ın açıq mənbələr üzərindən apardığı araşdırma zamanı məlum olub ki, “Lego Group” son bir ildə 11 tenderin qalibi olub. Şirkətin udduğu ən bahalı tender Məcburi Köçkünlərin Sosial İnkişaf Fonduna məxsus olub. Belə ki, əhalinin yeni yaşayış şəraitinə adaptasiya olunması üçün reinteqrasiya tədbirlərinin təşkili layihəsində icmalar üçün müxtəlif avadanlıqların alınmasına görə, şirkət Fonddan 1.5 milyon manat pul alıb.
İkinci bahalı tender isə FHN-ə məxsusdur. Nazirliyin Maddi-Təchizat İdarəsi bir ildə iki dəfə eyni məzmunlu məsələdə “Lego Group”la anlaşıb. Belə ki, İdarə Paraqrafa uyğun müxtəlif növ statistik cədvəllərin və mal-materialların alınması üçün şirkətə 2024-cü ilin yayında 955 min 450 manat, bu ilin avqustunda isə 941 min 241 manat pul ödəyib.