Məmurlar və məşhur müğənnilər: Status, eqo, yoxsa daxili ehtiyac?

Son illərdə Azərbaycanda məmur həbsləri ilə bağlı xəbərlərdə eyni bir tendensiya müşahidə olunur. Demək olar ki, cinayət məsuliyyətinə cəlb edilən məmurun adı hər dəfə tanınmış müğənnilərlə hallanır. Bəzən söhbət səhnə arxası münasibətlərdən gedir, bəzən isə sosial tədbirlərdəki görüntülər, daha şəxsi hallarda isə fərdi əlaqələr gündəmə gəlir.

Cəmiyyətin bu hadisələrə reaksiyası da müxtəlifdir: bir tərəf bunu “sosial təbəqələrin toqquşması” kimi dəyərləndirir, digərləri isə “ego, hakimiyyət və özünü təsdiq ehtiyacının təzahürü” hesab edir.
Bəs görəsən, məmur təbəqəsinin məşhur müğənnilərə olan bu “xüsusi marağı” nə ilə bağlıdır? Bu, sadəcə status nümayişidirmi, yoxsa daha dərin psixoloji səbəbləri var? Bəlkə də bu, özünəvurğunluq, nəzarət ehtiyacı, narsizm və ya illərlə basdırılmış azadlıq arzusunun simvolik ifadəsidir.

Mövzu ilə bağlı Tribunainfo.az-a açıqlama verən psixoloq Aytən Ələkbərova bildirib ki, məmurlar da insandır. Onların musiqi duyumu, yaradıcılıq hissləri, şeiriyyatı, bəzilərinin isə gözəl qiraət bacarığı, rəsm çəkmək və şeir-əsər yazmaq kimi xüsusiyyətləri var. Bütün bunlar insanın ruhuna sakitlik verən amillərdir.
A. Ələkbərova qeyd edir ki, gərgin işdən sonra məmurlar şəxsi bağ evlərində və ya müəyyən məkanlarda müğənniləri görüb, onların musiqilərindən zövq alaraq dincələ bilirlər.
Psixoloq həmçinin “ən yaxşısı mənim yanımdadır” düşüncəsində olan məmur tiplərini analiz edərək deyib:

“Bəzən müəyyən insanlar şairləri də gətirib çıxarır. Antireklamın özü də bir reklam olduğu üçün sonradan insanlar susub, bəziləri isə oturub müzakirə edir. Heç bir məna daşımasa belə, bundan danışılır. Burada məmurların özlərini şəxsiyyət kimi dəyərləndirməsi və ‘mən ən yaxşısıyam, ən yaxşısı mənim yanımdadır’ düşüncəsi fərdlərə görə dəyişir. Ona görə də kimisə qınaq obyektinə çevirərək, onun bunu ego, sevgi və ya musiqiyə vurğunluq səbəbilə etdiyini tam açıqlamaq mümkün deyil. Bəzən dezinformasiyanın motivi yalnış ola bilər və bu, insanların yaşam tərzinə, böyüyən övladlarına təsir edə bilər. Lakin açıq şəkildə ailə həyatı quran insanlar öz seçimlərini edirlər. Məsələn, bir çox müğənnimiz güc strukturlarında çalışan insanların həyat yoldaşıdır və onlar daha xoşbəxt ailə həyatı yaşayırlar.”

Qeyri-rəsmi həyat tərzi yaşayan məmurlar barədə də danışan psixoloq vurğulayıb:

“Qeyri-rəsmi həyat tərzi istər məmurların, istər digər insanların iradə gücündən asılıdır. İnsan bunu qəbul edə bilər və ya edə bilməz. Təəssüf ki, bəzi həbslərdə bu barədə səs-küylər yaranır. Cinayət işinə görə isə, əgər insanın həqiqətən zərrə qədər də suçu varsa, o cəzasını çəkir və nəticəni qəbul edir”.