“Sanki danışmırlar, doğurlar, gücənirlər” - Alqış Həsənoğlundan bəzi YAP-çılara sərt ittiham

“Mən başa düşürəm. Ramiz Mehdiyev Prezident Administrasiyasının rəhbəri olub. Konyukturanın öz şərtləri, idarəçiliyin normativləri var. Yuxarıdan gələn direktivlərə riayət olunmalıdır və sair. Hamı durub aparat rəhhəbri ilə savaş açamlı deyildi ki”.

“Yeni Sabah” xəbər verir ki, bunu hakim Yeni Azərbaycan Partiyasının rəsmi mətbuat orqanı olan “Yeni Azərbaycan” qəzetinin baş redaktoru, keçmiş deputat Alqış Həsənoğlu bildirib.
Onun fikrincə, komanda daxilində konfrantasiya yaratmağa əlavə cəbhə açmağa lüzum da yoxdu:
“Hamının, o cümlədən sirsifətindən qaramat, xainlik yağan Mehdiyevin də ad gününü, yubileyini təbrik etmək olar. Onun haqqında tərif deyənləri linç etməyin tərəfdarı da deyiləm. Amma hər şeyin bir həddi var axı...Mehdiyev haqında təbrik videoları yayılır. Baxıram, sanki danışmırlar. Doğurlar. Gücənirlər ki, nəsə fövqəladə bir ifadə tapıb Mehdiyevin şəninə yaraşdırsınlar. Özü də danışanlar sıradan biriləri deyil. Kifayət qədər ciddi status sahibləridirlər. Mehdiyevə “siyasətin akademiki” deyirlər. Mehdiyevə “siyasətin akademiki” deyənlər bəs Heydər Əliyevin Azərbaycan tarixindəki və siyasətindəki yerini harda görürlər.? Mehdiyevi “dərin dövlət” adamı adlandırırlar”.
A.Həsənoğlu söyləyib ki, bu birbaşa istintaq üçün əvəzsiz materialdır, dərin dövlət paralel idarəçilik deməkdir: “Onda adamdan sörüşarlar ki, buyur gəl danış paralel strukturları dərinliy barədə nə bilirsən? Əcaib, həm də qorxulu bir mənzərə yaranır. Axı bu adamlar guya bizim elitamızı təmsil edirlər. Mənim heç şübhəm qalmayıb ki, Mehdiyev fərqli bir dinin daşıyıcısı olsaydı, bu adamlar ona xoş gəlsin deyə dini inanclarını da dəyişərdilər...”.
Qeyd edək ki, Alqış Həsənoğlunun bəhs etdiyi film Prezident Administrasiyasının keçmiş rəhbəri akademik Ramiz Mehdiyev barədə çəkilib.
Filimdə Dövlət İmtahan Mərkəzi İdarə Heyətinin sədri Məleykə Abbaszadə, Milli Məclisin İqtisadi siyasət, sənaye və sahibkarlıq komitəsi sədri Azər Əmiraslanov, Azərbaycan Dillər Universitenin rektoru, Xalq yazıçısı, akademik Kamal Abdulla, AMEA-nın prezidenti İsa Həbibbəyli, Milli Məclisin səhiyyə komitəsinin sədri,  akademik Əhliman Əmiraslanov, Baş nazirin sabiq birinci müavini Abbas Abbasov, Bakı Slavyan Universitetinin keçmiş rektoru Nurlana Əliyeva, Milli Məclisin keçmiş deputat Gültəkin Hacıbəyli (sonuncu üç nəfər vəzifədə olan dövrdə) və başqaları danışıb. Onlar R.Mehdiyev haqqında yüksək fikirlər səsləndiriblər.
Xatırladaq ki, oktyabrın 14-də Bakı şəhəri Səbail Rayon Məhkəməsi R.Mehdiyev barədə cinayət işi üzrə qərar qəbul edib. Qərara əsasən, məhkəmə xüsusilə ağır cinayət əməllərinə görə cinayət məsuliyyətinə cəlb edilmiş R.Mehdiyev barədə verilmiş vəsatəti təmin edərək, 4 ay müddətinə ev dustaqlığı qətimkan tədbiri seçib.
O, Cinayət Məcəlləsinin 278.1 (dövlət hakimiyyətini ələ keçirməyə yönələn əməllər), 274 (dövlətə xəyanət) və 193-1.3.2-ci (cinayət yolu ilə əldə edilmiş əmlakı leqallaşdırma) maddələri ilə ittiham olunur.
R.Mehdiyev 1995-2019-cu illərdə Prezident Administrasiyasının rəhbəri olub. O, YAP Veteranlar Şurasının üzvüdür.