Qüsurlu mebel, maddi ziyan, əsəb gərginliyi... - “Mutfakçı Azərbaycan” məhkəməyə verildi - DETALLAR

İlkin Manafovun rəhbərlik etdiyi “İM” MMC (“Mutfakçı Azərbaycan”) məhkəməyə verilib.

 
Pravda.az-ın əldə etdiyi məlumata görə, hazırda şirkət 2 vətəndaşın iddiası ilə bağlı məhkəmə qarşısındadır.
 
İddiaçılardan biri mebel alıcısı olmuş S.Abbasovdur. O, Nəsimi Rayon Məhkəməsinə müraciət edərək cavabdeh “Mutfakçı” mebelinə qarşı ilkin iddia üzrə pulun və dəymiş mənəvi zərərin ödənilməsi barədə tələb irəli sürüb.
 
İlkin iddia tələbi onunla əsaslandırılıb ki, tərəflər arasında 02 aprel 2024-cü il tarixdə müxtəlif növ mebel avadanlıqlarının hazırlanması və müqavilədə göstərilən məbləğ qarşılığında satılması barədə müqavilə imzalanıb. Həmin müqavilənin predmeti sayılan məhsulların siyahısı və qiymətləri müqavilənin ayrılmaz tərkib hissələri olan əlavə 1, 2 və 3 ilə müəyyən edilib. Müqavilənin 2.6 bəndinə əsasən müqavilə bağlanan gün 6 200 manat, mebel istehsala ötürüldükdə 3 400 manat, mebel tam təhvil verildikdə isə 2 400 manat, ümumilikdə 12 000 manat olmaqla ödəniş olmalı idi. Həmin müqavilənin şərtlərinə əsasən 40 iş günü ərzində müqavilədə göstərilən mebel avadanlıqları hazırlanıb ünvana təhvil verilməli idi. Müqavilənin şərtinə əsasən iddiaçı tərəfindən 02 aprel 2024-cü il və 22 aprel 2024-cü il tarixlərdə müvafiq olaraq 6 200 və 3 400 manat məbləğində pul ödənilib. 2024-cü ilin iyun ayının ilk on günlüyündə mətbəx mebelinin bir hissəsi ünvana gətirilsə də, onun tam qüsurlu olması səbəbindən cavabdehin əməkdaşları tərəfindən geri qaytarılıb və qüsurların tez bir zamanda aradan qaldırılmasına dair söz verilib. Lakin həmin gündən 4 aydan çox müddət keçməsinə baxmayaraq, müqavilədə göstərilən mebel avadanlıqları təhvil verilməyib, bununla da bağlanan müqavilənin şərtləri pozulub və bu da öz növbəsində həmin müqavilənin xitam verilməsinə səbəb olub.
 
Müqavilənin 6.1 bəndinə əsaslanaraq iddiaçı tərəfindən cavabdehə müqavilənin xitam verilməsi və ödənilmiş pulun geri qaytarılmasına dair bildiriş göndərilib. Nəticədə, müqavilə iddiaçı tərəfindən ləğv edilib.
 
Bildirilib ki, cavabdeh tərəfindən həmin bildirişin qəbul edilməsinə baxmayaraq heç bir nəticə olmayıb. Müqavilənin 4.9 bəndinə əsasən alıcı sifariş edilən mebelin satıcı tərəfindən gecikdirildiyi hallarda, hər gecikən iş günü üçün, mebel dəyərinin 0,1 % dəyərində kompensasiya istəmə hüququ yaranır. Bu hüququndan istifadə edərək iddiaçı tərəfindən ödənilmiş 9 600 manat və hər gecikdirilmiş günə 0,1 % hesablanmaqla (100 gün) 960 manat, ümumilikdə 10 560 manat məbləğində pulun tələb etmək hüququ yaranıb.
 
İddia tələbində qeyd edilib ki, ilkin olaraq qüsurlu mebelin ünvana gətirilməsi, onun qüsurların vəd edilmiş müddətdə aradan qaldırılmaması, sonradan mebel üçün ödənilmiş pulun qaytarılmaması nəticəsində cavabdeh tərəfindən iddiaçının qanunla müəyyən edilmiş istehlakçı hüquqlarının pozulması səbəbindən o və ailəsi əsəb gərginliyi, psixoloji sarsıntı və mənəvi iztirab keçirmişlər və nəhayət, hüquqlarının bərpası üçün məhkəməyə müraciət etməyə məcbur olub. Göstərilənlərə əsasən cavabdeh “İM” MMC-dən ödənilmiş 9 600 manat məbləğində pulun və 960 manat məbləğində kompensasiyanın, 1 000 manat məbləğində hüquqi yardıma görə xərcin, həmçinin dəymiş mənəvi zərərə görə 10 000 min manatın, cəmi 21 560 manat məbləğində pulun alınıb iddiaçıya ödənilməsi barədə qətnamə qəbul edilməsi xahiş edilib.
 
Şirkət də qarşılıqlı iddia üzrə vətəndaşa qarşı iddia qaldırıb. Belə ki, cavabdeh S.Abbasova qarşı maneələrin aradan qaldırılması və pul tələbinə dair qarşılıqlı iddia ərizəsi ilə məhkəməyə müraciət edib. Cavabdeh MMC ilə iddiaçı arasında bağlanmış alqı-satqı müqaviləsi üzrə vətəndaş tərəfindən ödənilməmiş 5 200 manat məbləğində vəsaitin və tərəflərindən ödənilmiş 72 manat məbləğində məhkəmə dövlət rüsumunun cavabdeh iddiaçıdan tutularaq MMC-nin xeyrinə ödənilməsinə dair qətnamə çıxarılması xahiş edilib.
 
Daha sonra qarşılıqlı iddia üzrə iddiaçı cavabdeh iddia tələbinin həcminin azaldılmasına dair ərizə təqdim edərək, ödənilməmiş 2 800 manat məbləğində vəsaitin və tərəflərindən ödənilmiş 72 manat məbləğində məhkəmə dövlət rüsumunun cavabdeh iddiaçı tutularaq MMC-nin xeyrinə ödənilməsinə dair qətnamə çıxarılmasını xahiş edib.
 
Məhkəmənin qərarı ilə ilkin iddia tələbi (vətəndaşın iddiası) qismən təmin edilib. İlkin iddia üzrə cavabdehdən 9 600 manat məbləğində əsas, 200 manat məbləğində kompensasiya borcu olmaqla cəmi 9 800 manat və hüquqi yardım xərcinin əvəzi olaraq 500 manat məbləğində pul vəsaiti tutularaq S.Abbasova ödənilməsi qərara alınıb. İlkin iddia tələbi qalan hissədə təmin edilməyib. Qarşılıqlı iddia tələbi də qismən təmin olunub. Ödənilməmiş 400 manat məbləğində pul vəsaiti və ödənilmiş dövlət rüsumunun 30 manatı qarşılıqlı iddia üzrə cavabdeh iddiaçıdan tutularaq qarşılıqlı iddia üzrə iddiaçı cavabdehə ödənilməsi qərara alınıb. Tərəflər həmin qərardan apellyasiya şikayəti veriblər. Hazırda iddia Bakı Apellyasiya Məhkəməsində araşdırılır.
 
Qeyd: “İM” MMC hazırda alqı-satqı müqaviləsi üzrə digər vətəndaş tərəfindən də məhkəməyə verilib. Hazırda həmin iddia üzrə işə Nəsimi Rayon Məhkəməsində baxılır.