Bu baxçada uşaqlara meyvə və ət verilmir? — Direktor danışdı (VİDEO)

Bakı şəhəri, Xəzər rayonu, Mərdəkan qəsəbəsi, Sergey Yesenin küçəsində yerləşən “İnci” körpələr evi-uşaq bağçasında baş verən özbaşınalıqlarla bağlı valideynlər tərəfindən redaksiyamıza şikayət ünvanlanıb.

Tribuna.az-a şikayət edən valideynlər iddia edir ki, ilk növbədə uşaqlara normal qida verilmir.
Eyni zamanda, şikayətdə qeyd olunur ki, 1-cə dəfə verilən şorbanın içində su və kartof olur. Ət dadı gəlsin deyə də yəqin ki, “qalina blanka” əlavə edirlər. Uşaqlara normal meyvə verilmir.
Bundan əlavə, iddiaya əsasən, bağçaya dövlət tərəfindən ayrılan qidalar bağça rəhbərliyi tərəfindən maşınlarla özləri üçün daşınır.
Bu gün bir çox bağçada oxşar problem olan, ən vacib məqamlardan birinə də toxunan valideynlər əlavə ediblər ki, əgər bağça dövlətindirsə, ölkəmizin rəhbəri var, cənab prezidentimizin ayırdığı vəsaitlə bütün bağçalara maliyyə ayırıldığı halda, nəyə görə hər uşaqdan 40 manat pul alınır? Uşaqların payı oğurlanır. Onlar pulsuz getməli olduğu bağçaya pul ödəyirlər.
Məsələ ilə bağlı Tribuna.az-a açıqlama verən “İnci” körpələr evi-uşaq bağçasının direktoru Rəvanə Ağayeva yeməklərlə bağlı iddialara toxunaraq bildirib ki, yeməklər bizə həftəlik gəlir və gündəlik də paylanılır. Bunun daşınması mümkün deyil. Çünki bizim bağçamız elə yerdə yerləşir ki, 4 korpusun, arasından biz bir çöp də çıxara bilmərik. Səhərlər uşaqlara kəsmik və yumurta verilir. Sıyıq isə hər gün var. Çünki bu menyunu təhsil tərtib edir. Ancaq yeməklər qramı ilə verilir. Məsələn, hərəyə bir peraşki təşkil olunur. Doymayan uşağa mən ikinci peraşkini verə bilmərəm. Mən qramdan kənara çıxa bilmərəm. Ola bilər ki, həmin uşaq evdə gedib deyir ki, “mən doymadım”. Sırağa gün uşaqlar katlet yeyib, birinci gün isə küftə yeyiblər. Axşama balqabaqla düyü olur. Hətta makaronu azaldıblar. Çünki makaron uşaqların inkişafı üçün ziyandır. Meyvəyə gəldikdə isə, banan və alma olur. Mən kənardan meyvə və digər ərzaqların uşaqlara valideynlər tərəfindən verilməsinə icazə vermirəm. Çünki digər uşaqların nəfsi çəkə bilər. Bəlkə birinin imkanı yoxdur. Onu valideyn evində uşağına versin. Mənim nədənsə çəkinəcəyim olsa, sizi bağçaya dəvət etməzdim. 15 ildir burada direktor vəzifəsində çalışıram. 1995-ci ildən də burada müəllimə işləyirəm.
Ödəniş məsələsinə də toxunan direktor qeyd edib:
“Düzdür, dövlət baxçasıdır. Amma biz valideynləri buna məcbur etmirik. Öz də 40 manat yox, hərdən, valideynlərin istəyi ilə bayramlarda 20 manat pul ödənilir. Mən sizdən nə gizlədim. Hərdən biz 20 manat istəyirik. Çünki valideynlər istəmir ki, geyinilmiş paltarı, keçən il biri geyinir, o biri il digəri. Həmin ödəniş buna görə də yığılır. Valideynlərin istəyindən asılı olaraq.”
Direktor əlavə edib ki, bağçada “açıq qapı” günləri olur. Valideynlər gəlib iştirak edə bilir.
Dəniz Pənahova