Kinorejissordan Mədəniyyət Nazirliyinə SƏRT ittihamlar - "Belə davam edə bilməz”

Son günlər Mədəniyyət Nazirliyinin tabe qurumlarındakı rəhbər şəxslərlə bağlı narazıçılıqlar bitmək bilmir. Baş verən hadisələrlə bağlı məşhur Qara Volqa filminin rejissoru, kino rejissor Elşən Məmmədov Moderator.az saytına öz fikirlərini bildirib.

 
Onun sözlərinə görə bu gün Mədəniyyət Nazirliyinin bəzi rəhbər şəxslərinin yürütdüyü yalnış siyasət nəticəsində mədəniyyətimiz məhv olmaq təhlükəsi ilə üzləşir:
 
“Dövlət büdcəsindən Mədəniyyətimizin inkişafı üçün ayrılan vəsait düzgün xərclənilmir.Azərbaycanfilm kino studiyası formal olaraq mövcud olsa da, orada faktiki olaraq yaradıcı mühit öldürülüb və heç bir film istehsalı aparılmır. 20-ci əsrdə Azərbaycanın canlı yaddaşına çevrilmiş sənədli filmlər istehsalı ilə məşqul olan Salnamə film studiyası bağlanıldı.O studiya Azərbaycan mədəniyyət tarixinin incisi idi.”
 
Kino rejissor Qızıldaş Mədəniyyət Mərkəzinin bağçaya çevirən direktorun hələ də vəzifədə saxlanılması ilə bağlı Mədəniyyət nazirliyinin kadr siyasətini kəskin şəkildə təndiq edib:
 
“Mədəniyyət evləri, mədəniyyət klubları həmişə mədəniyyətin beşiyi olub. Tarixən uşaqlarımız və gənclərimiz məhz orada olan pulsuz dərnəklərdə yetişərək böyük sənətə addım atıblar. Görünən odur ki, mədəniyyət evlərindəki Xalq teatrlarının çoxu sıradan çıxarılıb, ya da sənəd üzəri adlar saxlanılır. Mənim özümün sənətə gəlişim xalq teatrından başlayıb. O zaman toxuculuq kombinatının nəzdində mədəniyyət klubu fəaliyyət göstərirdi. 1985-1986-cı illərdə mən orada aktyor kimi fəaliyyətə başladım və bu sənəti sevdiyim üçün kinorejissor olmağa qərar verdim.Hazırda bir çox Xalq artisti adı almış şəxslərin çoxunu mən həmin mədəniyyət klubundakı özfəaliyyət dərnəklərində görürdüm. Xalq artistlərimiz məhşur nağara ustası Natiq Şirinov və qarmon ustası Ənvər Sadıqov da həmin mədəniyyət klubunda çalışırdılar. İndi isə təzə təmirli Mədəniyyət Mərkəzi binasının hamının gözü qarşısında qanunsuz bağçaya çevrilməsi və bunu edən şəxsin nazirlik tərəfindən dəstəklənməsi mədəniyyətimizin köksünə vurulan bıçaq yarasdır. Belə şəxslər o sistemdə qaldıqca mədəniyyətimiz çətin ki, düzəlsin.”
 
Elşən Məmmədov Opera və Balet Teatrı ətrafında baş verən qalmaqallara və Xalq artisti Əvəz Abdullayevin işdən çıxarılmasına da münasibət bildirib:
 
“Dərindən nəzər saldıqda görürsən ki, probleblemin kökü Mədəniyyət Nazirliyindən qaynaqlanır. Mədəniyyət Mərkəzini bağçaya çevirən direktordan insanlar şikayət edir, nazirlik görməzdən gəlir. Opera və Balet Teatrının hazırkı rəhbərliyi ilə bağlı Xalq artistləri şikayət edir, heç bir tədbir görülmür. Əvəz Abdullayevi şəxsən tanımasam da, onun sənətini çox bəyənirəm. O, möhtəşəm səsə malik sənətkarımızdır. Bu cür sənətkarı dövlət teatrından uzaqlaşdırmaq özlüyündə mədəniyyətimizə və opera sənətimizə xəyanətdir. Belə bir gücdə sənətkarın nazirlik tərəfindən sözünə, səsinə və etirazına qulaq asılmırsa, bizim mədəniyyətimizin inkişafından danışmağa heç bir haqqımız yoxdur. Əvəz bəy sənət eşqi ilə alışıb yanan insandır.Onun səsini, sözünü eşitmək lazımdır. Əvəz Abdullayev kimi sənətkarın sistemdən uzaqlaşdırılaraq Mədəniyyət Mərkəzini bağçaya çevirən direktorun işdə saxlanılması gülünclükdür. Bu belə davam edə bilməz”.