Rövşən Nəcəf tənqid edildi: “Peşəkarlar qaz iyi gələn yerdə yox, ətir iyi gələn kabinetlərdə var?”

“Rövşən Nəcəf (SOCAR rəhbəri-red), “peşəkar” dedikdə işini vicdanla və yüksək səviyyədə görən insan başa düşülür, istər qaynaqçı olsun, istər usta, istər fəhlə, istərsə də mühəndis. Peşəkarlar qaz iyi gələn yerdə yox, ətir iyi gələn kabinetlərdə var? Son aylarda "Azəriqaz"ın sistemində “əlavə peşəkarlıq” mövzusu işçilər arasında ən çox müzakirə olunan məsələlərdən birinə çevrilib. Xüsusilə idarəetmə aparatında, departament rəhbərliklərində və bəzi mühəndis heyəti arasında bu əlavələrin necə və kimlərə verilməsi ciddi suallar doğurur”.

 
Pravda.az xəbər verir ki, bu sözləri hüquq müdafiəçisi Mirvari Qəhrəmanlı deyib.

O qeyd edib ki, yağışda, palçıqda, qaz sızmasının içində çalışan qaynaqçı, qəza zamanı həyatını riskə atan çilingər, illərlə istehsalatın yükünü daşıyan fəhlə “adi işçi” olaraq qalır: “Sizin gözünüz bu qədər bağlıdır ki? Ay özünü peşəkar hesab edən rəhbərlər, görmüsünüz ki, mindən çox abonentə xidmət edən satış xidməti üzrə çalışan çilingərlərin gördüyü işlərin siyahısı heç də kiçik deyil? Hər ay sayğac göstəricilərinin oxunması, hər üç aydan bir texniki baxışların keçirilməsi, ödəniş etməyən abonentlərin qaz təchizatının dayandırılması, qaz sızmalarının qarşısının alınması, sayğac dəyişiklikləri və digər ağır, məsuliyyətli işlər. Üstəlik, bütün bunlar həm fiziki, həm də təhlükəsizlik baxımından ciddi risk altında həyata keçirilir. Amma universitet diplomunun mürəkkəbi hələ qurumamış bəzi şəxslər və ya tamam başqa sahədən gəlib birbaşa kabinet mühəndisi olanlar qısa müddətdə "əlavə peşəkar” statusu qazanır. Belə görünür ki, peşəkarlıq artıq iş təcrübəsi ilə yox, kondisionerli otağın yerləşdiyi mərtəbə ilə ölçülür. Ən maraqlı məqam isə budur ki, bu əlavələrin hansı kriteriyalar əsasında verildiyini soruşanda ortada nə konkret mexanizm görünür, nə də şəffaf izah. Halbuki peşəkar dedikdə işini vicdanla və yüksək səviyyədə görən insan başa düşülür. İstər qaynaqçı olsun, istər usta, istər fəhlə, istərsə də mühəndis. Əgər “əlavə peşəkarlıq” həqiqətən peşəkarlığa görə verilirsə, o zaman istehsalatın ən ağır yükünü çəkən insanların adları niyə siyahılarda görünmür? Yox, əgər məsələ başqa meyarlarla ölçülürsə, onda buna “əlavə peşəkarlıq” demək bir az çətin görünür. Daha uyğun variantlar da tapmaq olar: “rəhbərliyin simpatiya paketi”, “kabinet komfort əlavəsi” və ya “tanışlıq əsasında yüksək peşəkarlıq mükafatı...”