Putinin sözçüsü: Kimsə Zelenskini sülhü istəməyə məcbur etməlidir

Londonda keçirilən sammitdə Ukraynaya maliyyə dəstəyinin artırılması müharibənin davam etdirilməsinə hesablanıb.

 
Bu barədə Kremlin mətbuat katibi Dmitri Peskov Ukrayna və Avropa İttifaqı liderlərinin Londonda keçirilən sammitini şərh edərkən bildirib.
 
Onun sözlərinə görə, sammitdə səslənən bəyanatlar Avropanın sülh istəmədiyini göstərir: "Orada da bəyanatlar səsləndi ki, təcili olaraq Ukraynaya maliyyənin artırılması səviyyəsini təmin etmək lazımdır. Bu, açıq şəkildə sülh planı üçün deyil, hərbi əməliyyatların davam etdirilməsi üçündür. Bu, bizim anladığımızdır. Qalanı hansı sülh planlarının tərtib olunacağından və hansı sülh planlarının müzakirəyə çıxarılacağından asılı olacaq".
 
Kreml sözçüsü Avropanın münaqişənin həllində rol oynaya biləcəyi ilə bağlı da suala cavab verib.
 
"Hazırda bu prosesə istənilən konstruktiv dəstək və hər hansı konstruktiv təşəbbüslər tələb olunacaq. Aydındır ki, kimsə Zelenskini Vaşinqtonla ünsiyyətindən sonra Ağ Evdə şübhəsiz qalan xoşagəlməz çöküntünü neytrallaşdırmaq üçün onunla dialoq baxımından xeyli səy göstərməli olacaq. Aydındır ki, bunu etmək asan olmayacaq. Üstəlik, kiminsə Zelenskinin özünün mövqeyini dəyişməyə məcbur etməsi vacibdir. O, sülh istəmir. Kimsə Zelenskini sülh istəməyə məcbur etməlidir. Əgər avropalılar bunu bacarırsa, onlar hörmət və təriflərə layiqdir", - deyə Peskov vurğulayıb.
 
APA