Sumqayıtda evdə doğulan körpə öldü, qadının durumu ağırdır - Yenilənib
 

Sumqayıtda 23 yaşlı qadın evdə doğuş edib, körpəsi ölüb.

“Qafqazinfo” xəbər verir ki, hadisə ötən gün saat 08:00 radələrində baş verib.
Belə ki, 2002-ci il təvəllüdlü Sevil Almurad qızı Səlimova yaşadığı evdə təbii doğuş edib. 
Ev şəraitində baş verən doğuş zamanı körpə ölüb.
Məsələ ilə bağlı TƏBİB-dən “Report”a bildirilib ki, ötən gün saat 05:23-də Ceyranbatan qəsəbəsindən təcili tibbi yardım xidmətinə çağırış daxil olub:
“Çağırış əsasında saat 05:35-də ünvana təcili tibbi yardım briqadası cəlb edilib. Hadisə yerində 23 yaşlı qadının vaxtından əvvəl doğuş keçirdiyi müəyyən edilib. Təcili tibbi yardım briqadası hadisə yerinə çatdıqda dölün həyat əlamətləri müşahidə edilməyib və ölü doğuş halı qeydə alınıb. Müvafiq qaydalara uyğun olaraq, həkimə qədər ölüm faktı qeydə alınıb.”
Hadisə ilə bağlı müvafiq araşdırmalara başlanılıb.
***
Sumqayıt Tibb Mərkəzindən “Report”a bildirilib ki, Sumqayıtda evdə doğuş zamanı körpəsi ölən 23 yaşlı qadının vəziyyəti ağırdır.
Qeyd olunub ki, zahı qadın ötən gün mərkəzin nəzdindəki Perinatal Mərkəzin Təcili yardım şöbəsinə hospitalizasiya olunub. Zəruri tibbi xidmətlər göstərilən pasiyent stasionar tibbi xidmətdən imtina edərək evə buraxılıb.
Məlumata görə, o, bu gün saat 10:10 radələrində yenidən təcili tibbi yardım avtomobili vasitəsilə Perinatal Mərkəzin Təcili tibbi yardım şöbəsinə hospitalizasiya olunub, müvafiq şöbədə müalicəsi davam etdirilir, vəziyyəti orta ağırdır.
Həmçinin bildirilib ki, 23 yaşlı qadın hamiləlik dövründə heç bir tibb müəssisəsində qeydiyyatda olmayıb.