Fatma Mahmudova: “Nişan xəbərinə sevinməyənlər ağzına gələni yazır, Nigara nə olub?”

“Bu xəbərə siz sevinirsiniz, sevinməyənlər isə ağzına gələni yazır. Nə istəyirlər, yazsınlar, mən sözün düzünü deyirəm. Başqa formada yazanlar da nə etsinlər, bekarçılıqdır... Heç kimi təhqir etmək fikrində deyiləm, xətrinə də dəymirəm. Səhhətimdə böyük problem yaşayıram. Ona görə kiməsə pis cavab vermək fikrim yoxdur. Sevinənlər sağ olsunlar... İllərdir, Nigar əziyyət çəkir, işləyir, xəstə anasına baxıb, indi də taleyi gətirib. Nə istəyirlər? Yığışdırsınlar bu söz-söhbəti...”

 
Bu sözləri Pravda.az-a açıqlamasında Xalq artisti Fatma Mahmudova qızı Nigar Tofiqin baş tutan nişan mərasimi ilə bağlı deyilənlərə münasibət bildirərkən deyib.
 
O bildirib ki, ailə məsələsi oyun-oyuncaq deyil və bu məsələdə qurama ola bilməz: “Mən özüm qurama adamam ki, qurama da iş görüm? Hərə bir cür sual-cavab edir, deyirlər quramadır, cavab verirəm ki hə, quramadır, əl çəkin məndən. Hər kəs ailə qura bilər, Nigara olmaz? Nigara nə olub? Xalq tərəfindən sevilən aktrisadır, müğənnidir. Artıq o öz tamaşaçı kütləsinə özünü sevdirə bilib. Hərə bir söz yazır. Nigar göz qabağındadır, anasının çox əziyyətini çəkib. İllərdir, səhhətimdə problem yaşayıram, ağır əməliyyat keçirmişəm. Qızım həmişə mənim köməyimdə durub. Nigar da sıradan biri deyil, hər adamla ailə qura bilməzdi. Özünün xoşuna gəlib, gözəl insandır, çox istedadlı, yaxşı oğlandır. Duet ortaqlığı da uğurlu alınıb. Toyun vaxtını hələ dəqiqləşdirməmişik. Maraqlananlara təşəkkür edirəm. Təki mən onun toyunu görüm. Oğlan qızı sevir, qız da oğlanı... Çox gözəl ailə ilə qohum oluruq”.