Rusiya bankları Azərbaycanda bağlana bilər? – CİDDİ ÇAĞIRIŞ

Rusiya ilə Azərbaycan arasında artan siyasi gərginlik fonunda, ölkəmizdə fəaliyyət göstərən Rusiya mənşəli bankların taleyi yenidən müzakirə mövzusuna çevrilib.

Rusiyanın Azərbaycandakı bankları bağlanmalıdırmı? Onların fəaliyyəti də məlum deyil, sanksiya altında olan bir ölkədir. Çirkli yeyintiləri belə bilinmir.
Məsələ ilə bağlı Tribunainfo.az-a açıqlama verən Ağ Partiyanın başqanı, siyasətçi Tural Abbaslı bildirib ki, bu gün Azərbaycan və Rusiya arasında siyasi gərginlik var. Təəssüflə qeyd etməliyəm ki, Rusiya artıq bu gərginliyi kriminal səviyyəyə keçirib. Öz hüquq-mühafizə orqanlarını Azərbaycan vətəndaşlarına qarşı cinayətlərlə biruzə verir.
T. Abbaslının sözlərinə görə, Dövlət özünü cığal uşaq, yolu kəsən quldur, dağlarda gizlənən terrorçu kimi aparmamalıdır. Evlərə basqın etməməlidir. İnsanları məhkəməsiz, istintaqsız qətlə yetirməməlidir. Amma Rusiya bu gün bunları edir. Bu təkcə, hansısa kriminal hadisənin araşdırılması deyil, Azərbaycana təzyiq vasitəsidir. Azərbaycandan əldə etmək istədiyi siyasi maraqları əldə edə bilməyəndə həmişə Rusiyada yaşayan soydaşlarımıza əllərində olan riçaqlarla Azərbaycana təzyiq etmək istəyirlər. Azərbaycan da bu və ya digər formada ya qarşı qoyur, ya da razılığa gəlir. Amma bu gün Rusiya əllərində olan bütün riçaqlarla bizə təzyiq etməyə çalışırlarsa, hətta televiziya kanallarında bizi təhqir etdirirlərsə, digər beynəlxaq aləmdə öz təsir vasitələrindən istifadə edib Azərbaycanı sıxışdırmaq istəyirlərsə, təbii ki, Azərbaycan da buna adekvat formada cavab verməlidir. Demirəm ki, dövlət olaraq Azərbaycanda yaşayan Rusiya vətəndaşlarına qarşı qanunsuzluqlar, həbslər aparıb qətlə yetirsin. Amma, hər halda Azərbaycanda fəaliyyət göstərən böyük rus şirkətlərinin, bankların bu və ya digər formada fəaliyyətini məhdudlaşdırmaqla Rusiyaya mesaj vermək olar ki, “sən belə davam etsən, biz də təzyiqlər edəcəyik”, ki, artıq normal danışıqlara başlasınlar. Bu aspektdən baxaraq təbii ki, bankların da fəaliyyətinin məhdudlaşdırılması nəzərdən keçirilməlidir. Onsuz da Rusiya banklarının bir çox ölkələrdə fəaliyyəti məhdudlaşdırılıb. Hətta onların bank kartları belə ödəniş vasitəsi kimi beynəlxalq platformalarda qəbul edilmir. Amma Azərbaycan hələ də bu məhdudiyyətlərə, sanksiyalara qoşulmayıb. Bir mənada Rusiya iqtisadiyyatının bir nəfəsliyi rolunda çıxış edir. Belə bir çox qonşu ölkələr var və Azərbaycan da bu nəfəsliklərdən biridir. Əgər Rusiya özünü Azərbaycanla rəqib, düşmən dövlət kimi aparmağa davam etsə, təbii ki, Azərbaycan da əlində olan bütün riçaqlardan istifadə edərək Rusiyaya layiqli cavabını verməlidir. Düşünmürəm ki, Azərbaycanda Rusiya banklarının fəaliyyətinin məhdudlaşdırılması Azərbaycan iqtisadiyyatına ölümcül zərbələr vuracaq. Hər halda Rusiya banklarının Azərbaycan üzərindən etdiyi əməliyyatların miqdarının azalması Rusiyanın İqtisadiyyatına bu və ya digər formada təsir edə bilər.