AXCP və Müsavat fəaliyyətini dayandırmalıdır...

İdeoloji təhlükəsizlik qorunmasa, suverenlik sual altına düşəcək. Bu zaman heç kəs Azərbaycana kömək edə bilməyəcək. 2020-ci ildən etibarən dünyada mövcud olan bütün ideoloji sistemlər sarsıdıcı zərbələr aldı. Bu gün isə dövlətlərin ideoloji sərhədlərinin pozulması onların suverenliklərini də ciddi təhdid altına almaqdadır. İdeoloji təhlükəsizlik suverenliyin həm əsas, həm də müəyyənedici şərtidir. 

Əksər dövlətlər “ideoloji müdafiə sistemi” qurmaqla ölkənin daxilinə axın edən yad dəyərlərin, ideoloji diversiya hücumlarının, mənbəyi və təyinatı dövlətdən gizlədilən külli miqdarda maliyyə vəsaitlərinin qarşısının alınması istiqamətində qətiyyətli addımlar atmalı oldular. Nəticədə bu dövlətlərdə mövcud olan “paralel dövlət” öz funksionallığını, rıçaqlarını, çevikliyini və perspektivi itirməli olub. Bu gün dünyanın əksər dövlətlərinin milli dəyərlər sistemi informasiya selinin qarşısında çilik-çilik olmaqdadır.

“Ramiz Mehdiyev işi” xarici qüvvələrin Azərbayca yaratdığı sistemin zərərsizləşdirilməsi daha çox kadr məsələlərini önə çıxarır. 

Amma bu,

- siyasi sferada, 

- kadr məsələlərində,

 - ideoloji platformalarda, 

- mediada, 

- iqtisadi sahədə, 

- icra strukturlarında və s. nəhəng bir osminoqun qollarını xatırladır. 

Effektiv və həlledici addımlar da atılıb. Məsələn, xüsusilə xarici təsirlərin suverenliyə yaratdığı təhlükələrin mediadakı enerjisi bloklanıb. Lakin daha çox iş qarşıdadır. 

Xarici təsirlərin şəffaflaşdırılması, kadr islahatları, radikal qrupların zərərsizləşdirilməsi, ölkənin siyasi, iqtisadi, ideoloji bloklarını hədəf alan xarici diversiya mərkəzlərinin daxildəki icraçı təşkilatları və s. sıradan çıxarılmalıdır. Başqa yol yoxdur, əks halda dövlətin suverenliyi də sual altına düşməli olacaq. Bu zaman heç bir güclü ordu, böyük iqtisadiyyat dövləti xilas edə bilməyəcək. 

Çünki ideoloji təhlükəsizlik dövlətin “pasportu”dur.

Heç şübhəsiz, Azərbaycan son 30 ildə xarici qüvvələrin təsirlərindən ən çox əziyyət çəkən ölkələrdən biridir. 

Öncə xarici və daxili risklər müəyyənləşdirilməlidir və güman edirəm ki, Azərbaycan dövlətinin müvafiq qurumları “risklər bloku”unun ən incə detallarına qədər xəbərdardır. “Ramiz Mehdiyev işi”ni - suverenliyə təhdid yaradan daxili və xarici elementlərin zərərsizləşdirilməsinin, “paralel dövlət”in sıradan çıxarılması istiqamətində böyük miqyasda prosesə sart verildiyinin əsas göstəricisi kimi qiymətləndirmək olar. 

Xüsusilə qeyd olunmalıdır: 

Birincisi, Ramiz Mehdiyev 2019-cu ilin oktyabr ayında Prezident Adimistrasiyasının rəhbəri vəzifəsindən uzaqlaşdırılıb. 2019-cu ildən bu günə qədər isə ölkədə müxalifətin heç bir böyük mitinqi baş tutmayıb. Hətta strateji təşəbbüslər olmayıb. Bu fakt təsadüfi deyil. Uzun illər boyunca müxalifət mitinqlərinin keçirilməsi və koordinasiyası məhz Ramiz Mehdiyevin nəzarətində olub. O, müxalifətin potensial təhlükə mənbəyi kimi görünməsini təmin etməklə, dövlətə özünün "sistemin dayağı" olduğunu göstərməyə çalışırdı. Başqa sözlə, idarə olunan bu siyasi gərginlik onun hakimiyyətdəki mövqeyini qorumağın əsas mexanizmlərindən birinə çevrilmişdi.

İkincisi, feminist qruplar “strateji” təşəbbüslərdən məhrum olublar. “İdeoloji diversiyanın çılpaq üzü” kimi xarakterizə olunan feministlər ölkənin bütün dəyərlər sistemini hədəfə almışdılar. Bu gün onların şüarları - müharibə əleyhinə çağırışlar, xarici qrantların sərbəst şəkildə, hesabatsız və təyinatı gəstərilmədən xərclənməsi, ailə institutlarının məhvi, şəhid ailələrini üsyana təşviq etmə cəhdləri və s. heç pıçıltı kimi də qulağa dəymir.

Bu gün hər iki partiyanın Azərbaycan suverenliyinə ciddi təhdidlər yaradan xarici qüvvələrin tamamilə təsiri altında olduğu və uzun illər R.Mehdiyevin “gərəklilik cədvəli”ində yer aldıqları heç bir şübhə doğurmur. Hansı xarici kəşfiyyat-diversiya qrupu ölkəyə maliyyə, ideoloji tezislər soxmaq istəyirsə, məhz bunlardan platforma kimi istifadə edir. 1990-2000-ci illərin əvvələrində məhz R.Mehdiyevin kadrları hər iki partiyanın maliyyələşdirilməsinin əsas personaları kimi gündəmdə idilər. Bu gün hər iki partiya R.Mehdiyevin şüuraltı müdafiəsi ilə məşğuldur. Ailə dəyərlərinin, milli ləyaqət hissinin, mental amillərin sıradan çıxarılmasını hədəfləyən feministlər məhz bu partiyaların ideoloji müdafiəsi və siyasi mühafizəsi altında fəaliyyət göstəriblər. Xaricdən Azərbaycan dövlətinin suveren sütunlarını hədəfə alan şəxslər də məhz hər iki partiya ilə eyni paraleldə yer alırlar. 

Azərbaycanda təxribatların, iğtişaşların baş verəcəyi ilə bağlı şantaj dolu xarici “hesabatlar”a istinad edən və onların müdafiəsinə sığınan da məhz hər iki partiyadır. Dünyadakı sistemlər, ideoloji formullar, texniki imkanlar, mübarizə platformaları, siyasi texnologiyalar və ideoloji istiqamətlər tamamilə dəyişib, lakin hər iki partiya primitiv “meydan şinel”indən çıxa bilməyiblər - tələblər, arzular, niyyətlər eynidir. Bu primitivlik siyasi sahədə şəffaflaşdırmanı tamamilə bloklayıb, heç bir açılım, təşəbbüs, yeni tələb-təklif yoxdur. Fürsət axtarışındadırlar – nə zamansa Azərbaycanda xaos baş versin və əsas siyasi qüvvə kimi təşəbbüsü ələ alsınlar. Yəni, 30 ildir dəyişməyən “icbari” və cılız öhdəlik!

İkinci Qarabağ Müharibəsindən sonra Müsavat partiyasının impulsiv başqanı İsa Qəmbərin oğlu İlkin Qəmbər ermənilər haqqında “Ermənistan Krallığı: Roma ilə Parfiya arasında - Qədim tarix. Sənədli film” adlı film çəkdi. Əslində İsa Qəmbər elə həmin gün “öldü”. 

Vaxtilə R.Mehdiyevin siyahısı əsasında parlamentə düşən cəbhəçi deputatlar, daha sonra iqtidardan qopub iqtidarla-müxalifət arasında köhnə “sovet körpüsü” rolunu oynayan ingilisdilli cəbhəçilər hansı proseslərin baş verəcəyini daha dəqiq bilirlər. Çünki hansı oyunların iştirakçısı olduqlarını dərk edirlər.

Əgər ideoloji təhlükəsizliyi qorumasaq, suverenlik təhlükə altına düşəcək. Bu o deməkdir ki, suverenliyi təhdid altına altına alan bütün sahələr təmizlənməlidir. 

İdeoloji sərhədləri itirsək, Azərbaycanın xəritəsinin də bir əhəmiyyəti qalmayacaq. 

Xalqın ideoloji cəhətdən tərksilah edilməsini planlayan ölkə həyatının bütün sahələrdəki marginal və xarici qüvvələrin təsiri altında olan qruplar zərərsizləşdirilməlidir. Eləcə də  siyasi sferada… 

Samir Feyruzov