Aİ-nin enerji təhlükəsizliyi: Bakı praqmatik yanaşma təklif edir

Azərbaycan Prezidentinin köməkçisi - Prezident Administrasiyasının xarici siyasət məsələləri şöbəsinin müdiri Hikmət Hacıyev Slovakiyanın "Hospodárske noviny" (HN) nəşrinə müsahibəsində ölkəmizin Avropanın etibarlı enerji tərəfdaşı kimi rolu, Mərkəzi və Şərqi Avropa dövlətləri ilə əməkdaşlığın genişləndirilməsi perspektivləri barədə ətraflı danışıb.

Hikmət Hacıyev bu regionun Bakının xarici siyasətindəki roluna toxunaraq qeyd edib:
"Mərkəzi və Şərqi Avropa ölkələrini ənənəvi dostlarımız və tərəfdaşlarımız kimi nəzərdən keçiririk. Onlarla tarixən yaranmış əlaqələrimiz və dostluq münasibətlərimiz var, xüsusən də söhbət Çexiya və Slovakiya kimi ölkələrdən gedir. İyun ayında Praqada keçiriləcək "Globsec" təhlükəsizlik konfransında iştirak etmək fürsətinə görə çox təşəkkür edirəm. Bəzən diplomatik və yüngül yumorla qeyd edirik ki, Slovakiya və Çexiyadan olan dostlarımızla dialoq aparmaq bizim üçün çox rahatdır, axı bir-birimizi gözəl başa düşürük. Bizim çoxlu ortaq cəhətlərimiz var, oxşar çağırış və çətinliklərlə üzləşirik. Bu mənada demək olar ki, siz bizim üçün vacib tərəfdaşlarsınız, onların vasitəsilə Avropa İttifaqına və digər beynəlxalq qurumlara mesajlarımızı çatdıra bilərik. Bütün bu aspektləri nəzərə alsaq, nəticə aşkardır: Mərkəzi Avropa ölkələri etibarlı tərəfdaşlarımızdır".
Jurnalistlər ötən ilin mayında Slovakiyanın Baş naziri Robert Fitsonun Bakıya səfərini xatırladıblar. Həmin vaxt baş naziri əsasən energetika və müdafiə sektorundan olan 40-dan çox sahibkardan ibarət nümayəndə heyəti müşayiət etmişdi. Azərbaycanın Avropa ölkələri ilə əlaqələrində enerjinin əhəmiyyəti ilə bağlı sualı cavablandıran Hikmət Hacıyev bildirib:
"Bəli, şübhəsiz. Nəticə etibarilə məhz enerji sayəsində Slovakiya və digər ölkələrlə çox yaxşı təmaslarımız qurulub. Amma vurğulamaq istərdim: münasibətlərimiz tarixi kontekstə əsaslanır. Əvvəllər də aramızda çoxlu insani və siyasi əlaqələr olub. Bu ənənəvi zəmin əsasında iqtisadi və ticarət əlaqələrini fəal şəkildə inkişaf etdiririk. Enerji isə Azərbaycanın Avropa İttifaqı ölkələri əməkdaşlığının və tərəfdaşlığının əsas elementi qismində çıxış edir".
Prezidentin köməkçisi enerji sektorunda cari qarşılıqlı əlaqə məsələsi üzərində ayrıca dayanıb:
"Azərbaycan qazı Trans-Adriatik Boru Kəməri vasitəsilə Avropa bazarına tədarük edilir. Bu gün Azərbaycan Avropanın səkkiz ölkəsinə qaz tədarük edir, ümumilikdə isə 12 Avropa ölkəsi ondan istifadə edir. Biz etibarlı tərəfdaş olduğumuzu dəfələrlə sübut etmişik. Üstəlik, qaz və energetika sahəsində əməkdaşlıq heç bir siyasi mətnaltı məna olmadan həyata keçirilir - bu, yalnız kommersiya məsələsidir, sırf biznesdir. Eyni zamanda, şübhəsiz ki, tərəfdaşlarımızın enerji təhlükəsizliyində maraqlıyıq".
2022-ci ilin fevralında Rusiya-Ukrayna müharibəsinin başlanmasından sonra enerji sahəsində əməkdaşlıq güclənibmi sualını cavablandıran Hikmət Hacıyev qeyd edib:
"Şübhəsiz. 2022-ci ildə Avropa Komissiyasının prezidenti Ursula fon der Lyayen Azərbaycana səfər etdi. Bu, demək olar ki, Rusiya-Ukrayna müharibəsi başlayandan dərhal sonra baş verdi. Həmin vaxt Avropa İttifaqının yeni enerji impulsuna kəskin ehtiyacı yarandı və onun həllində Azərbaycan mühüm rol oynadı. Biz Avropanı lazımi qaz tədarükləri ilə təmin etdik. Baş nazir Fitsonun Bakıya səfəri də bu müzakirələrin tərkib hissəsi idi".
Azərbaycanın Aİ ilə enerji tərəfdaşlığını gələcəkdə gücləndirmək üçün addımlarından danışan prezidentin köməkçisi deyib:
"Dünyadakı mövcud vəziyyəti nəzərə alaraq, Aİ ilə imzaladığımız Anlaşma Memorandumu əsasında yeni strateji enerji kooperasiyası qurmaq istəyirik. Lakin bunu həyata keçirmək üçün uzunmüddətli müqavilələr lazımdır. Top hazırda Avropa İttifaqının tərəfindədir. Biz sadəcə onun cavabını gözləyirik".