Mingəçevirdə iş çevirən MÜƏMMALI ŞİRKƏT- Küçə ticarəti, NARAZI SAKİNLƏR…

Mingəçevirdə İcra Hakimiyyətinin binasında təmir işləri aparılan zaman fəhlənin yerə yıxılaraq ölməsi barədə məlumat vermişdik. 1991-ci il təvəllüdlü Emil Şükürovun dünyasını dəyişməsi ilə bağlı araşdırma aparılması barədə xəbər verilsə də heç bir rəsmi açıqlama olmadı.

Ölüm hadisəsinin olmasını nəzərə alaraq hadisə ilə bağlı cinayət işinin açıldığına inanırıq.
Tribunainfo.az xəbər verir ki, Ajans.az –ın sorğusuna cavab verən Mingəçevir icra hakimiyyətindən bildirmişdilər ki,  İcra Hakimiyyətinin ön fasad hissəsinin əsaslı təmir işlərinin katirovka sorğusu prosedurunun qalibi “LİDER-LİNE” MMC şirkəti olub. Yəni məsuliyyət şirkətin üzərindədir. Araşdırmamız nəticəsində məlum oldu ki,  “LİDER-LİNE” MMC 2021-ci ildən Mingəçevirdə abadlıq-təmir işləri aparır. Bu şirkət Mingəçevir Şəhər İcra Hakimiyyətinin tabeli qurumlarının abadlıq-təmir işləri ilə bağlı keçirdiyi tenderlərin qalibi seçilib. Şirkətin ilk adı “Lider-NN” MMC olub.
Əldə etdiyimiz məlumata görə bu şirkət Mingəçevirdə əsas etibarilə ətriyyat və geyim məhsullarının satışı ilə məşğuldur.
Maraqlıdır ki, “Lider-Line” MMC-nin fəaliyyət profili, inşaat sahəsində fəaliyyəti üçün  müvafiq lisenziyaları, mühəndis və işçi heyəti barədə açıq mənbələrdə məlumat yoxdur. MMC-nin qanuni təmsilçisi Aslanov Ramil Rafail oğludur. Ramil Aslanovdan əvvəl şirkətin qanuni təmsilçisi Əsgərov Namizəd Şahmar oğlu olub.
Ajans.az bu barədə xəbər paylaşandan sonra Mingəçevirdə küçə ticarətinin vüsət alması, bazarın qarşısında xaotik bir vəziyyətin olması, meyvə-tərəvəzlə dolu avtomobillərin yolun əks istiqamətində dayanmaqla intensiv hərəkətin mövcud olduğu əsas yolu zəbt etməsi, mərkəzi yolun küçə ticarətçiləri tərəfindən zəbt olunması, parklarda keyfiyyətsiz əyləncə qurğularının quraşdırılması, Kür çayında qayıqların, katerlərin qanundan kənar fəaliyyət göstərməsi iddiası ilə redaksiyamıza müraciətlər daxil oldu. Bu yaxınlarda katerlərin toqquşması, bir müddət əvvəl çayda gəminin yanması faktları da hamının xatirindədir.
Ajans.az – ın tiktok səhifəsində hadisə barədə təqdim edilən videonun şərh bölümündə isə Mingəçevirlə bağlı ciddi ittihamlar yazıldı və bu şərhlərin yazılması hələ də davam edir. Şərh yazanlar isə ünvanlarını belə gizlətmədən Mingəçevirdə bir çox ərazilərin acınacaqlı durumda olduğunu diqqətə çatdırırlar.
Şərhlərdə əsas etibarilə şəhərin mərkəzi prospektində kanalizasiya sisteminin olmaması, asfalt problemi, Mingəçevirdə binaları təmir edən “LİDER-LİNE” MMC-nin şəhərdə yaşayış və qeyri yaşayış binalarının təmirini keyfiyyətsiz həyata keçirməsi iddia olunur.
Məsələn Mingəçevir sakini olduğu deyən izləyicilərdən biri şərhdə yazır ki onun yaşadığı Ə.Vahid küçəsi 4-də binalar təmir edilərkən dəyişilməli olan çürük pəncərələr plastik pəncərələrlə əvəz olunmalı imiş. Amma əksinə çürük çərçivələr boyanıb və yenidən köhnə pəncərələr taxılıb. Quraşdırılmasına söz verilən plastik çəçivə və pəncərələri görən olmayıb.
Bundan əlavə şərh yazan izləyicilər Mingəçevir İcra Hakimiyyətinin başçısından narazılıqlarını ifadə ediblər.