"Şərurlu İsfəndiyar" ən çox şikayət edilən iş adamıdır" - Ondan 5 milyon manat tələb edilir

Böhtan və təhqir maddələri ilə xüsusi ittiham qaydasında məhkəməyə verilən "Şərur MTK"nın sahibi İsfəndiyar Axundovun ("Şərurlu İsfəndiyar") növbəti məhkəmə prosesi keçirilib.

Oxu.Az-ın məlumatına görə Binəqədi Rayon Məhkəməsində hakim Vüsal Tağıyevin sədrliyi ilə keçirilən prosesdə iş adamından şikayət edən və hazırda həbsdə olan Emin Səməndərov konvoyun müşayiəti ilə prosesə gətirilib.
Tanınmış iş adamı İsfəndiyar Axundov da həmçinin prosesdə iştirak edib.
Prosesdə İsfəndiyar Axundovun Emin Səməndərovun ünvanına söylədiyi ifadələrin yenidən ekspertizaya göndərilərək rəy verilməsiylə bağlı vəsatətlər təqdim edilib.
İddiaçı tərəfin vəkilinin dediyinə görə, əldə edilmiş sorğulardan bəlli olub ki, İsfəndiyar Axundov ən çox şikayət olunan iş adamı kimi tanınıb.
Xüsüsi ittiham qaydasında təqsirləndirilən İsfəndiyar Axundov isə zərərçəkən tərəfdən ondan tələb olunan 5 milyon manat məbləğə görə etirazını bildirib. İş adamı ona qarşı irəli sürülən iddia tələbini əsassız sayıb.
Qeyd edək ki, İsfəndiyar Axundov iş adamı Emin Səməndərovun ünvanına təhqiramiz ifadələr işlətdiyi üçün qarşı tərəfdən xüsusi ittiham qaydasında şikayət edilib. Onun barəsində Cinayət Məcəlləsinin 147.2-ci (böhtan) və 148-ci (təhqir) maddələri üzrə xüsusi ittiham qaydasında məhkəməyə verilib.