İcra başçısının plaşı: “Daha diqqətli olmalıdır ki, digər vətəndaşlardan ifrat dərəcədə seçilməsin”

“Azərbaycan demokratik dövlətdir, Konstitusiya ilə təsbit olunub ki, hər bir insanın özünün hərəkət fəaliyyəti ilə bağlı hər hansı məhdudiyyət yoxdur. Mən düşünürəm ki, hansısa məmurun geyiminə yox, onun gördüyü işlərə, fəaliyyətinə fokuslanmaq lazımdır”.

Bu sözləri “Yeni Sabah”a keçmiş icra başçısı və hazırki Milli Məclis Nəsib Məhəməliyev deyib.
O, "Balıq festivalı"nda geydiyi plaşı 26 000 manat dəyərində olduğu iddia olunan Neftçala rayon İcra Hakimiyyətinin başçısı Mirhəsən Seyidov ətrafında yaranmış ajiotajı şərh edib: 
“İstər məmur, istər sahibkar olsun, təvazökarlıq yaxşı şeydir. İstənilən halda, cəmiyyətdə yaşayırıq və bu cəmiyyət bir orqanizmdir. Ətrafda xüsusi təmtəraqlı tədbir keçirmək imkanı olmayan insanlar varsa, belə populist yanaşmalardan uzaq olmaq lazımdır. Daha çox təvazökar olmaq, seçilməmək gərəkdir.
Bu baxımdan, hesab edirəm ki, məmurlarımız daha diqqətli olmalıdır ki, digər vətəndaşlardan ifrat dərəcədə seçilməsinlər. Bu həm də bizim mənsub olduğumuz dində də öz əksini tapıb”.
N. Məhəməliyev qeyd edib ki, qanunvericilikdə, xüsusən, "Dövlət qulluqçularının etik davranış qaydaları haqqında" Qanunda məmurların geyimi, yaxud qatıldığı tədbirlərlə bağlı hansısa məhdudiyyət yoxdur:
“Bazar iqtisadiyyatı şəraitində ola bilər ki, məmurun yaxın ətrafı, ailəsi kifayət qədər imkanlıdır. Amma buna hansısa məhdudiyyət yoxdur. Bütün dünya ölkələrində belədir. Məmur, dövlət qulluqçusu nə geyinir-geyinsin, şəxsi işidir. Bu, daha çox insanın əxlaqından irəli gələn, vicdan məsələsidir. Həddən artıq pafoslu, təmtəraqlı geyim əşyalarından istifadə etmə dövlət qulluqçularına hörmət gətirmir”.
Xatıralatma: Neftçala rayon İcra Hakimiyyətinin başçısı Mirhəsən Seyidovun geyindiyi plaşın qiyməti sosial şəbəkələrdə müzakirə mövzusu olub.Plaşın "Hugo Boss Burberry" brendinə məxsus və 26 000 manat dəyərində olduğu iddia olunur.
Mirhəsən Seyidovun sözlərinə görə, yayılan məlumatlar həqiqəti əks etdirmir və sözügedən geyimin yeni və bahalı brend deyil: "İlk olaraq onu qeyd edim ki, bu brendin yeni bir marka olduğunu ilk dəfə sizdən eşidirəm. Hazırda bu plaş mənim əynimdədir və bunu 3 il bundan qabaq 350 manata almışam".