Çoxmənzilli binalarda internet problemi: MTK yalnız özünün razılaşdığı provayderlə müqavilə bağlamağa icazə verir - QANUN POZUNTUSU

Yeni binalarda internet provayderləri ilə bağlı bir sıra şikayətlər mövcuddur. Mənzil sahibləri  bildirirlər ki, yalnız MTK-nın əvvəlcədən müəyyən etdiyi şirkətlər xidmət göstərə bilir. MTK isə adətən yalnız bir internet provayderi ilə müqavilə bağlayır, digər provayderlərin binaya daxil olmasına icazə verilmir. Nəticədə sakinlər faktiki olaraq seçim hüququndan məhrum olurlar.

 
Bəs bu məsələyə hüquqi yanaşma necədir?
 
Mövzu ilə bağlı Pravda.az-a açıqlama verən hüquqşünas Arzu Əliyevanın sözlərinə görə, MTK bu işlərə qarışmalı deyil, hər bir sakinin öz seçim hüququ var:
 
“Mənzili üçün hansı provayderi istəyirsə, onunla əlaqə saxlayıb, müqavilə bağlaya bilər. MTK belə etməklə insanların hüquqlarını məhdudlaşdırır. Vətəndaşlar etiraz etməlidirlər. MTK-dan şikayət verməlidirlər. İstənilən provayderə MTK icazə vermirsə, vətəndaşın hüquqlarını məhdudlaşdırdığı barədə şikayət edilə bilər, hərçənd ki, MTK-nın ümumiyyətlə belə bir səlahiyyəti yoxdur”.
 
A.Əliyeva bildirib ki, məhz bu səbəbdən yeni Mənzil Məcəlləsində məhəllə komitələrinin yaradılması nəzərdə tutulur: “Bu komitələr məhəllə daxilində yaranan məsələlərin həlli ilə məşğul olmalıdır və MTK-nın buna qarışmağa ixtiyarı yoxdur. İstər kommunal haqlarının ödənilməsi, istər mənzilə buraxılan istilik sistemi, istərsə də liftlərlə bağlı problemlər məhəllə komitələri tərəfindən həll edilməlidir. Nə qədər nəzərdə tutulan məhəllə komitələri mövcud deyil, yaradılmayıb MTK-lar belə problemlər yaradırlar. MTK tərəfindən provayderlərlə bağlanan, vətəndaşın hüququnu məhdudlaşdıran müqavilə etibarsızdır, qanunsuzdur və vətəndaş şikayət edə bilər”.
 
A.Əliyeva əlavə edib ki, maneənin hansı qaydada və kim tərəfindən yaradıldığı mütləq şəkildə aydınlaşdırılmalıdır: “Məsələn, hansısa komendant internet xəttinin çəkilməsinə icazə vermirsə, bu halda vətəndaşın həmin hərəkətə görə polisə müraciət etmək hüququ var. Bildirilirsə ki, icazəni MTK vermir, bu zaman MTK-ya qarşı məhkəmədə iddia qaldırmaq mümkündür. Bu səbəbdən hər bir halda maneə yaradan şəxs və ya qurum dəqiqləşdirilməlidir. İcazə verməyən adi komendantdır, yoxsa MTK? Bu suala cavab aldıqdan sonra müvafiq instansiyalara müraciət edilə bilər. Məsələ inzibati qaydada həll olunmursa və MTK-nın bu istiqamətdə hansısa qərarı və ya provayderlə razılaşması mövcuddursa, həmin müqaviləni əldə edərək məhkəmədə mübahisələndirmək olar. Çünki bu cür müqavilələr vətəndaşın hüquqlarını məhdudlaşdıran sənəd kimi qiymətləndirilə bilər”.