Milyonluq QALMAQAL: Tale Heydərov həbsdəki iş adamını BAĞIŞLAYIB?

Fövqəladə hallar naziri Kəmaləddin Heydərovun oğlu Tale Heydərovun bir milyon manatının ələ keçirilməsi ilə bağlı məhkəmə başlayıb.

 
Yenilik.az "Qafqazinfo"ya istinadən xəbər verir ki, Heydərovun aldadılması ilə bağlı iki məşhur iş adamı ittiham edilsə də, indi onlardan biri - "Azfinance İnvestisiya Şirkəti" QSC-nin direktoru İntiqam Səfərəliyev mühakimə olunur.
 
Gənc biznesmen həbsdə saxlanılır, Bakı Ağır Cinayətlər Məhkəməsinə konvoyun müşayiəti ilə gətirilib.
 
Müdafiə tərəfini təmsil edən vəkillər prosesdə iştirak etmədikləri üçün bugünkü iclas təxirə salınıb.
 
Məlumata görə, Tale Heydərov artıq İntiqam Səfərəliyevlə razılıq əldə edib. O, daha əvvəl nümayəndəsi vasitəsilə məhkəməyə müraciət edərək təqsirləndirilən şəxsin həbsdən azad olunmasına etiraz etmədiyini bildirib. Bu barədə notarial qaydada təsdiq edilmiş sənəd də bu gün məhkəməyə təqdim olunub.
 
Tale Heydərova dəymiş ziyanın ödənilib-ödənilmədiyi və tərəflər arasında razılaşmanın hansı şərtlə əldə olunduğu hələlik məlum deyil. Ona görə ki, nümayəndənin təqdim etdiyi sənəd bu gün elan olunmayıb.
 
Qeyd edək ki, bu iş üzrə "Azfinance İnvestisiya Şirkəti" QSC-nin Müşahidə Şurasının sədri Abid Mamedov da cinayət məsuliyyətinə cəlb edilib. Lakin o, ölkədən qaçıb gizləndiyi üçün barəsində qiyabi həbs qətimkan tədbiri seçilib, axtarışa verilib. A.Mamedov daha əvvəl Heydərovlara aid olduğu deyilən "AFB Bank"ın Müşahidə Şurası sədrinin müşaviri, İ.Səfərəliyev isə həmin şuranın üzvü olub.