“Tiktok”er “Bəniz”in məhkəməsində ifadə verən şahid görün nə dedi

Bakı Ağır Cinayətlər Məhkəməsində hakim Fəxri Məmmədovun sədrliyi ilə hədə-qorxu ilə pul tələb etmədə təqsirləndirilən "tik-tok"er Aybəniz Xəlilovanın cinayət işi üzrə məhkəmənin növbəti prosesi keçirilib.

Lent.az xəbər verir ki, məhkəmə şahid ifadəsi ilə davam edib.
Şahid M.Ş. heç vaxt ifadə vermədiyini bildirib:
"Mən iki il yarım - 2024-2025-ci illərdə  Xalid Kazımovun mebel sexində işləmişəm, mühafizə xidmətində idim. O xəstə olanda Aybəniz xanım ona çox dəstək olurdu, yemək gətirirdi, qulluq edirdi. Aybəniz xanımın evində də dəfələrlə olmuşam, uşaqlarını gəzməyə aparmışam.
Aybəniz xanım çox diqqətli insan idi. Bir dəfə məni fikirli görəndə təklif edib dedi: "Əgər bir problemin varsa, maşınımı satıb problemini həll edə bilərsən".
Mən bu təklif üçün ona təşəkkür etdim, amma razılaşmadım. Bir-iki dəfə olub ki, X. Kazımov 300-500 manat pulu Aybəniz xanıma  çatdırmağımı istəyib, amma ortada heç vaxt böyük məbləğ olmayıb".
Məhkəmə daha sonra şahidin ilkin istintaq zamanı verdiyi ifadəni elan edib:
"Bakıda X. Kazımovun mebel sexində işləmişəm. İşlədiyi müddətdə bir neçə dəfə Aybəniz xanım sexə gələrək hay-küy salıb,  "Bura mənim ərimin sexidir, məni dərhal içəri buraxın" deyə tələb etsə də obyektin mühafizəçisi kimi onu sexə buraxmamışam. Xalid çox vaxt sexdə qalırdı. Bir dəfə onun yanına gedəndə çox  üzgün gördüm. Səbəbini soruşanda Aybəniz adlı qadının onu şantaj etdiyini, həyatdan bezdirdiyini dedi. İki dəfə  Xalidin tapşırığı ilə  müxtəlif məkanlarda 15 000 manatı Aybənizə vermişəm. Bir dəfə Aybəniz xanıma dedim ki, adamı rahat buraxsın, yazıqdır,  evində də problemləri yaranıb deyə ofisdə qalır". 
Şahid elan olunan ifadə ilə razılaşmadığını, heç vaxt belə bir ifadə vermədiyini məhkəməyə desə də, qeyd olunan imzanın ona məxsus olduğunu bildirib: "Bizim aramızda əvvəllər də sənəd imza söhbətləri filan  olurdu deyə mən bu kağızların  nə olduğunu heç soruşmadım".
Məhkəmə prosesinə onlayn qoşulan X. Kazımov sənədlərin onun ofisində imzalandığını etiraf edib. 
Növbəti proses mayın 19-u saat 17:00-a təyin olunub.
Xatırladaq ki, X.Kərimov adlı şəxs A.Xəlilova barəsində Suraxanı Rayon Polis İdarəsinə şikayət edib. Şikayətçi ərizəsində göstərib ki, A.Xəlilova ondan hissə-hissə olmaqla, 836 min manat pul tələb edib.
"Tik-tok"er barəsində cinayət işi başlanıb. A.Xəlilovaya qarşı Cinayət Məcəlləsinin 182.3.2 və 211.3-cü maddələri üzrə ittiham irəli sürülüb.