Rəqsanə xüsusilə ağır cinayət törədib - Taleyi necə olacaq?

“Rəqsanə İsmayılovanın törətdiyi iddia olunan əməl CM-in 178.4-cü maddəsində nəzərdə tutulmuş cinayət əməli, yəni etibardan sui-istifadə etmə və ya aldatma yolu ilə özgənin, xüsusilə, külli miqdarda əmlakını ələ keçirmə və ya əmlak hüquqlarını əldə etməklə törədilən dələduzluq cinayəti mülkiyyət əleyhinə olan xüsusilə ağır cinayətlər kateqoriyasına aid edilib”.

Yenilik.az xəbər verir ki, bu sözləri “Yeni Sabah”a hüquqşünas Sadiq Əfəndiyev deyib.

O bildirib ki, zərərçəkmişlə barışan şəxs cinayət məsulliyətindən azad oluna bilər:

“Bir sıra mülkiyyət əleyhinə və iqtisadi fəaliyyət sahəsində törədilən cinayətlərə görə cinayət məsuliyyətindən azad etmənin əsasları qanunda konkret olaraq göstərilib. CM-nin 73-1.3-cü maddəsinə əsasən bu Məcəllənin 178.3, 178.4, 179.3 və 179.4-cü maddələrində nəzərdə tutulmuş əməli (əməlləri) törətmiş, zərərçəkmiş şəxslə barışmış və dəymiş ziyanı tamamilə ödəmiş şəxs, cinayət nəticəsində vurulmuş ziyanın əlli faizi miqdarında dövlət büdcəsinə ödəniş etdikdə cinayət məsuliyyətindən azad edilə bilər”.

Hüquqşünas qeyd edib ki, sözügedən maddələrlə, o cümlədən CM-nin 178.4-cü maddəsində nəzərdə tutulmuş dələduzluq cinayətini törətmiş şəxsin cinayət məsuliyyətindən azad edilməsi onun tərəfindən üç hərəkətin edilməsini tələb edir: zərərçəkmiş şəxslə barışmaq; vurduğu ziyanı tamamilə ödəmək; vurduğu ziyanın əlli faizi miqdarında dövlət büdcəsinə ödəniş etmək.

Bununla yanaşı nəzərə alınmalıdır ki, xüsusilə ağır cinayət törətmiş şəxsin zərərçəkmiş şəxslə barışması, ziyanı ödəməsi və dövlət büdcəsinə ödənişi etməsi tam əminliklə onun barəsində cinayət işinə xitam veriləcəyini deməyə əsas vermir”.

Sadiq Əfəndiyevin sözlərinə görə, Rəqsanə İsmayılovanın ittiham olunduğu cinayət əməli xüsusilə ağır kateqoriyaya aiddir:

“Qanun nisbətən daha yüngül cinayətlər kateqoriyasına aid olan cinayətlərdən fərqli olaraq xüsusilə ağır cinayətlər kateqoriyasına aid cinayətlər törətmiş və zərərçəkmiş şəxslə barışmış, ziyanı və müvafiq ödənişi etmiş şəxsin cinayət məsuliyyətindən azad edilməsini imperativ qaydada cinayət təqibi orqanının üzərinə qoymamış, “bilər” sözündən istifadə etməklə bu məsələnin qiymətləndirilməsini və həll edilməsini həmin orqanın səlahiyyətlərinə buraxıb”.

Hüquqşunas bildirib ki, yüngül cinayətlərlə məhkum edilən məhkumlar qarşı tərəflə barışıq əldə edib, məbləği tam ödədiyi halda həbsdən azad edilir:

“Burada əsas məsələlərdən biri qarşı tərəflə barışıq əldə etməkdir. Rəqsanə İsmayılovanın mühakimə olunduğu maddə xüsusilə ağır cinayətlər kateqoriyasına aid edildiyi üçün onun haqqında tam şəkildə azad olunacaq fikrini səsləndirə bilmərik.

Eyni zamanda, Rəqsanə İsmayılovanın ittihamları qəbul edib, etmədiyini də bilmirik. Əgər qəbul etmirsə, nəyə görə ödəniş edir? Bütün bu məsələləri araşdırmaq lazımdır”.