Tacir Şahmalıoğlundan gündəm olan geyimi ilə bağlı yeni açıqlama

Müğənni Tacir Şahmalıoğlu son günlər müzakirə mövzusuna çevrilən geyimi ilə bağlı yeni açıqlama yayıb.

Musavat.com xəbər verir ki, o, bu cür paylaşımların milli-mənəvi dəyərlərimizə uyğun olmadığını deyib:
“Son günlər bəzi sosial media hesablarında və internet informasiya resurslarında mənimlə bağlı yayılan paylaşımları izləyirəm.
Təəssüf hissi ilə qeyd edirəm ki, bəzi şəxslər və media platformaları müəyyən görüntüləri qərəzli şəkildə təqdim edərək onları lağ-lağı və istehza mövzusuna çevirməyə, bundan diqqət cəlb etməyə və öz maraqları naminə istifadə etməyə çalışırlar. Belə yanaşma nə peşə etikasına, nə də milli-mənəvi dəyərlərimizə uyğun hesab oluna bilər”.
İfaçı bildirib ki, haqqında paylaşım edən şəxslər barəsində hüquqi tədbirlər görəcək:
“Şəxsin şərəf və ləyaqətinin alçaldılması, ictimai nüfuzunun hədəfə alınması və təhqiramiz məzmunun yayılması qəbuledilməzdir. Bu cür davranışlar cəmiyyətdə qarşılıqlı hörmət mühitinə zərbə vurur və yanlış ictimai rəy formalaşdırır.
Bu səbəbdən şərəf və ləyaqətimə, eləcə də ictimai nüfuzuma zərər vuran paylaşımların və materialların silinməsini tələb edirəm. Əks təqdirdə, qanunvericiliyin verdiyi hüquqlardan istifadə ediləcək və aidiyyəti şəxslər barəsində müvafiq hüquqi tədbirlərin görülməsi üçün rəsmi müraciətlər olunacaqdır.
Azərbaycan musiqisinə və mədəniyyətinə həsr etdiyim uzun illərin fəaliyyəti, tamaşaçı sevgisi və sənət yolunda qazandığım hörmət isə bu cür qərəzli yanaşmalara verilən ən tutarlı cavabdır”.