Zimbabvenin Vitse-prezidenti: Hökumət təkbaşına mənzil ehtiyacını qarşılaya bilməz

“Dünyanı Mənzillə Təmin Etmək, Təhlükəsiz və Dayanıqlı Şəhərlər və Yaşayış məskənləri” mövzusu çərçivəsində keçirilən bu forum qlobal əməkdaşlığın gücləndirilməsinə, siyasi öhdəliklərin artırılmasına və dünya üzrə təxminən 3 milyard insanı təsir edən qeyri-rəsmi yaşayış məntəqələri və evsizlik də daxil olmaqla mənzil böhranının həlli üçün praktiki strategiyaların işlənib hazırlanmasına töhfə verməlidir.

Bu barədə Zimbabvenin Vitse-prezidenti Konstantino Quveya Dominik Nyikadzino Çivenqa Bakıda Ümumdünya Şəhərsalma Forumunun 13-cü Sessiyasının (WUF13) açılış mərasimi çərçivəsində Liderlər Sammiti zamanı bildirib.
O qeyd edib ki, Zimbabve şəhər məkanlarının iqtisadi artımın, innovasiyanın və sosial inklüzivliyin mühüm mühərrikinə çevrilməsini vurğulayır və gözləyir ki, bu zirvə urbanizasiyanı Dayanıqlı İnkişaf üzrə 2030 Gündəliyinin həyata keçirilməsində real inkişaf alətinə çevirəcək praktiki strategiyalar ortaya qoyacaq:
“Zimbabve anlayır ki, hökumət təkbaşına mənzil ehtiyacını qarşılaya bilməz- xüsusilə də rəqabətli prioritetlər və məhdud resurslar fonunda. Buna görə də biz tikinti və innovasiyanın maliyyələşdirilməsində özəl sektorun rolunu önə çıxarırıq və mənzil təminatı ilə infrastrukturun inkişafını sürətləndirmək üçün dövlət–özəl tərəfdaşlıqlarına xüsusi əhəmiyyət veririk, hörmətli nümayəndələr.
Zimbabve hökuməti mənzili yalnız sığınacaq deyil, fundamental insan hüququ kimi qiymətləndirir.
Başlanğıcda Zimbabvedə təxminən 1,5 milyon mənzil çatışmazlığı mövcud idi. 2020-2025-ci illər ərzində bu çatışmazlıq təxminən 1 milyon mənzilin təmin olunması ilə azaldılıb. İkinci mərhələdə - 2026-2030 dövründə - biz daha 1 milyon mənzil hədəfləyirik. Biz anlayırıq ki, mənzil çatışmazlığı sabit deyil, daim dəyişən bir göstəricidir”.