“Qaçqınkom”da xaos: Şəhid ailələri, köçkünlər qapıda qaldı – Video

“Qaçqınkom”da növbə xaosu yaşanır. Məcburi köçkünlər, yaşlılar və şəhid ailələri saatlarla qapıda gözlətdirilir.

Tribuna.az-a daxil olan məlumata görə, 5 dekabr tarixində Qaçqın və Məcburi Köçkünlərin İşləri üzrə Dövlət Komitəsinə (Qaçqınkom) müraciət edən yüzlərlə məcburi köçkün ciddi çətinliklərlə üzləşib. Ev növbəsi və ya digər sosial məsələlərlə bağlı qəbula düşmək istəyən vətəndaşlar saatlarla qurumun girişində gözlədilib.
Şikayətçilərin bildirdiyinə görə, komitənin qarşısında nə növbə sistemi təşkil olunub, nə də vətəndaşlara hər hansı məlumat verilib. Əraziyə toplaşan insanlar kiminsə adını yazması, növbə müəyyən etməsi və ya girişin nə vaxt açılacağı ilə bağlı rəsmi açıqlama gözləsələr də, heç bir cavab almayıblar.
Qəbula düşmək istəyənlərin böyük hissəsini yaşlı insanlar, xəstələr və uşaqlı qadınlar təşkil edib. Onların sözlərinə görə, saatlarla ayaq üstə qapıda gözləmək həm sağlamlıqlarına ziyan vurur, həm də insanların narazılığını artırır:
“Bizə deyildi ki, qəbul saat 10-da başlayır. Amma nə saat 10-da, nə də ondan sonra heç kimi içəri buraxmadılar. Yaşlılar əsəbiləşir, xəstələr oturmağa yer tapmır, uşaqlı qadınlar çətinlik çəkir. Heç olmasa izah edərlər ki, niyə gecikir”.
Şikayətçilər bildirir ki, bu vəziyyət təkcə 5 dekabrda deyil, artıq bir neçə gündür davam edir. İnsanlar qeydiyyata düşmək üçün hər dəfə eyni xaosu yaşamalı olur:
“Hər dəfə gələndə eyni vəziyyət. Qapı bağlı, içəridən heç kim çıxıb bir söz demir. Sanki buradakılar insan deyil”.
Məlumata görə, həmin gün qəbula gələnlər arasında şəhid ailələri və qazilər də olub. Onlar da digər vətəndaşlarla birlikdə uzun müddət açıq havada və ya zalın havasız hissəsində gözləməyə məcbur ediliblər.
Problemin nədən ibarət olduğunu dəqiqləşdirmək üçün Qaçqın və Məcburi Köçkünlərin İşləri üzrə Dövlət Komitəsilə əlaqə yaratmağa çalışdıq. Lakin zənglərimizə cavab verən olmadı.
Qarşı tərəfin mövqeyini dərc etməyə hazırıq.